Суръати рушди иқтисодӣ дар кишварҳои Аврупо ва Осиёи Марказӣ дар соли 2025 то ба 2,4% коҳиш хоҳад ёфт, ки назар ба нишондиҳандаи соли 2024 3,7% камтар мебошад. Бонки ҷаҳонӣ бо нашри як гузориш дар ин хусус хабар дод.

Бар асоси гузориш, бо вуҷуди мушкилоти ҷаҳонӣ ва дохилӣ, минтақаи мазкур устувории иқтисодии худро ҳифз мекунад. Сабаби асосӣ коҳиши суръати рушд, сустшавии фаъолияти иқтисодӣ дар Русия мебошад, ки тақрибан 40 фоизи ҳаҷми умумии истеҳсолоти минтақаро дар бар мегирад.

Бар асоси арзёбии коршиносони Бонки ҷаҳонӣ агар Русия аз ҳисобҳо хориҷ карда шавад, рушди Маҷмуи маҳсулоти дохилӣ дар минтақа дар сатҳи устувори 3, 3% ҳам дар соли 2024 ва ҳам дар соли 2025 боқӣ мемонад.

Антонелла Бассани, муовини Президенти Бонки ҷаҳонӣ дар умури Аврупо ва Осиёи Марказӣ гуфт, ки барои таъмини рушди устувор кишварҳои минтақа бояд ислоҳоти сохториро амалӣ кунанд, ки ҳадафашон баланд бардоштани самаранокии меҳнат, офаридани ҷойҳои нави корӣ ва мутобиқ шудан ба тағйироти демографӣ аст.

“Барои расидан ба ин ҳадафҳо зарур аст, ки бахши хусусӣ рушд дода шавад, низоми таълим такмил ёбад ва робитаҳои иқтисодии миёни кишварҳо тақвият ёбад. Ҳамчунин, ҷалби сармоягузориҳои хусусӣ ва табдил додани ҷойҳои кори пастмузд ба ҷойҳои кори дорои дурнамои рушд хеле муҳим аст”- зикр мекунад Антонелла Бассани.

Дар гузориш зикр шудааст, ки самтҳои калидии афзоиши иқтисодӣ бояд сармоягузорӣ ба инфрасохтор, маориф, омӯзиши касбӣ ва дастгирии соҳибкорӣ бошанд.

Тибқи гуфтаи муаллифони гузориш бояд ба тавоноӣ ва нақши занону ҷавонон таваҷҷуҳи бештар зоҳир гардад, зеро ин омил метавоонад коҳиши шумораи аҳолии қобили меҳнатро ҷуброн кунад. Бар асоси пешбинии Бонки ҷаҳонӣ дар даҳсолаҳои наздик шумораи аҳолии қобили меҳнат дар Аврупои Марказӣ ва Шарқӣ ва Балканҳои Ғарбӣ метавонад то 17 миллион нафар коҳиш ёбад.

Дар айни замон, дар кишварҳои Осиёи Марказӣ ва Туркия шумори аҳолии қобили меҳнат афзоиш хоҳад ёфт, ки ин боиси пайдоиши мушкилоти нав, аз ҷумла таъмини ҷойҳои кор ва боло бурдани самаранокии меҳнат мегардад.

Коршиносони Бонки ҷаҳонӣ таъкид намудаанд, ки рушди иқтисодӣ дар минтақа бо монеаҳои мухталиф рӯ ба рӯ аст. Аз ҷумла рақобати заиф, имкониятҳои маҳдуди рушди ширкатҳои хурд, дастрасии кам ба маблағгузорӣ, низоми кӯҳнаи таҳсил ва саҳми баланди ширкатҳои давлатӣ рушди бахши хусусиро маҳдуд месозад.

Ивайло Изворски, иқтисоддони бузурги Бонки ҷаҳонӣ дар умури Аврупо ва Осиёи Марказӣ гуфт, ки ҳар як кишвар метавонад роҳи хоси худро барои рушди устувор бо истифода аз сарвати инсонӣ, захираҳои табиӣ ва инфрасохтор пайдо кунад.

“Агар кишварҳо ба офаридани ҷойҳои кори босифат ва рушди малакаҳои касбӣ диққати ҷиддӣ диҳанд, ин метавонад кафолати рушди устувори дарозмуддати иқтисодӣ гардад” – таъкид мекунад Изворски.

Dialog.tj