Ҷавод Зариф, Вазири корҳои хориҷии собиқи Ҷумҳурии Исломии Эрон бо ишора ба ҳамлаҳои ҳавоии Исроил ба Қатар гуфт, ки ин воқеа нишон дод, сулҳ барои Исроил таҳдиди ҳақиқии вуҷудӣ ба ҳисоб меравад.

Ҷавод Зариф дар саҳифаи худ дар шабакаи иҷтимоии “Х” навишт, ки “Ҳуҷуми шармовари Исроил ба Қатар собит намуд, ки Ғарби Осиё дар остонаи суқут қарор гирифтааст. Ин минтақа бояд интихоб кунад: идомаи таҷовузи беинтиҳо ё оғози ҳамкории воқеӣ”.

Ҷавод Зариф таъкид намуд, ки ҳамла ба музокиракунандагони сулҳ дар Қатар бори дигар собит месозад, ки Исроил сулҳро таҳдиди аслӣ барои худ мебинад. Ба гуфтаи ӯ, бомбаборонҳои Исроил "ҳич хатти сурхе” –ро риоя намекунад ва боиси бесуботии бештар дар минтақа мешавад.

Ин  изҳороти Ҷавод Зариф дар ҳоле садо медиҳад, ки ташаннуҷ миёни Исроил ва Ҳамос ба Қатар низ кашида шудааст. Ин кишвар дар солҳои ахир нақши миёнҷигарро дар гуфтугӯҳои сулҳи Ҳамос бо Исроил бар уҳда дошт. Ҳоло ин кишвар ҳадафи ҳамлаҳои ҳавоии Исроил қарор гирифтааст.

Dialog.tj