Дар пайи таҳдидҳо дар хусуси оғоз шудани ҷанги дубора миёни Эрон ва Исроил Вазорати дифои Ҷумҳурии Исломии Эрон гуфт, ки Неруҳои мусаллаҳи Эрон қавитар шудаанд.

Ризо Тилоинек, сухангӯи Вазорати дифоъ ба пуштибонии неруҳои мусаллаҳи Ҷумҳурии Исломии Эрон гуфт, ки баъд аз Ҷанги 12-рӯза сатҳи омодагии амалиётӣ, низомӣ ва логистикии неруҳои мусаллаҳи Ҷумҳурии Исломии Эрон назар ба замони гузашта афзоиш ёфтааст.

Ӯ, ки дар маросими гиромидошти кушташудаҳои ҷанги Исроил сухан мегӯяд, афзуд, ҳарчанд дар ҷанги ахир ба бахшҳои низомии Эрон осебҳо расид, аммо таҷрибаҳои бадастомада боиси афзоиши қобилияти дифоӣ ва амниятии кишвар шуд.

Ризо Тилоинек афзуд, ки ҳоло 60 фоизи силоҳу таҷҳизот ва муҳимоти неруҳои мусаллаҳ дар дохил ва асосан, ба воситаи бахши хусусӣ ва ширкатҳои донишбунёд истеҳсол мегардад, ки ин нишон аз худкифоӣ ва коҳиши вобастагии хориҷа дорад.

Ба гуфтаи сухангӯи Вазорати дифои Эрон Ризо Тилоинек имрӯз Эрон дар самти қудрати мушакӣ дар қатори 10 кишвари пешсафи ҷаҳон қарор дорад. Ӯ вуҷуди роҳбари мудаббир, ҷонбозиҳои неруҳои мусаллаҳ, талоши давлат ва ваҳдати мардумро омилҳои аслии пирӯзӣ дар Ҷанги 12-рӯза донист.

Ӯ афзуд, ки бар асоси таҳқиқот 60 фоизи афкори умумии кишварҳои ҷаҳон Эронро пирӯзи ҷанг ва режими саҳюнистро шикастхӯрда арзёбӣ мекунанд.

Сухангӯи Вазорати дифои Эрон гуфт, ки амният ва дифоъ имрӯз аз хусусияти “сифати нарм” бархӯрдор аст ва Эрон дар ҷанги ахир тавонист бо ҳимояти ҳаррӯзаи Вазорати дифоъ ба неруҳои мусаллаҳ ва боиси шикасти руҳии душман гардад. Ба гуфтаи ӯ, мақсади режими саҳюнистӣ аз ин ҳамла заиф сохтани Эрон ва водор намудани кишвар ба таслим буд, ки натиҷа надод.

Бино ба иттилои Ризо Тилоинек бар асоси иттилои мавҷуд 50 ҳазор нафар шаҳрвандон дар сарзаминҳои ишғолшуда (Исроил) талаби ҷуброни хисороти Ҷанги 12 –рӯза кардаанд ва дар арсаи ҷаҳонӣ низ нафрати ҷаҳонӣ бар зидди ин режим бештар гардидааст.

Dialog.tj