Эътилофи мухолифони Арманистон дар парлумон бо роҳбарии президенти собиқи ин кишвар Роберт Кочарян имзои санади созишномаи сулҳ бо Озарбойҷон дар Вашингтонро “санади таслимӣ” унвон карда, зикр намуд, ки он барои кишвар таҳдиди вуҷудӣ эҷод мекунад.

Баъди се рӯзи имзои созишнома Эътилофи мухолифон дар парлумони Арманистон бандҳои созишномаро баррасӣ карда, зикр карданд, ки ин созишнома “санади таслим”, “таҳдиди вуҷудии миллӣ” буда, ҳокимияти кишварро дар зери хатар мегузорад ва “поксозии қавмӣ” дар Қарабоғро қонунӣ мекунад.

Гурӯҳи мухолифин таъкид намуданд, ки ин санад ҳич дастоварде барои Арманистон надорад ва дар он нақшаи ба расмият шинохтани марзҳои кишвар ва ҳамчунин, кафолати Амрико вуҷуд надорад. Онҳо ҳушдор доданд, ки ҳукумати Никол Пашинян бо имзои созишнома ба амалкардҳои Озарбойҷон, аз ҷумла хориҷ кардани масъалаи Қарабоғ аз рӯзномаи байналмилалӣ ва ишғол намудани сарзамини Арманистон машруият мебахшад.

Армине Минасян, котиби фраксияи Ҳайастан ба банди созишнома дар мавриди каридори Зангизур ва ибораи “роҳи бемонеа” ишора карда, суол гузошт, ки дар сурати эълони вазъи фавқулода оё марзбонони арман ҳақ доранд, ки ҳаракати мошинҳоро маҳдуд кунанд ё на?

Эдмон Марукян, роҳбари Ҳизби ғайрипарлумонии Арманистони рӯшан имзои созишномаро “шикасти бузурги дипломатӣ” номид. Ӯ гуфт, ҳарчанд ҷонибҳо тамомияти арзии якдигарро эътироф кардаанд, аммо дар созишнома ягон нақшаи расмӣ барои ба расмият шинохтани марзҳои Арманистон аз ҷониби Озарбойҷон ворид нашудааст.

Дар вокуниш ба интиқодҳо Мария Карапетян, намояндаи ҳизби ҳоким мухолифонро ба “дархост кардани чизҳои ғайривоқеӣ” ва “талоши нигоҳ доштани низои абадӣ” муттаҳам намуданд.

Dialog.tj