Футболбози маъруфи португалӣ ва ҳамлагари бошгоҳи арабии “Ал-Наср” Криштиану Роналду ба Ҷорҷина Родригес, дӯстдухтараш пешниҳоди оиладорӣ кард.

Хабари пешниҳоди оиладории футболбозро Ҷорҷина Родригес дар саҳифаи Инстаграмаш бо нашри як акс расонаӣ намуда, чунин навиштааст: “Ман розӣ ҳастам. Ҳам дар ин зиндагӣ ва ҳам дар умрҳои дигар”.

Нашри ин хабар дар саҳифаи Ҷорҷина Родригес дар ҳолест, ки худи Роналду ин корро накардааст. Ҳамчунин, бояд гуфт, ки онҳо замони барпо кардани тӯйро нагуфтаанд.

Криштиану Роналду 40-сола аст, вале то ҳол расман издивоҷ накардааст ва ин пешниҳоди издивоҷ барои мухлисонаш ногаҳонӣ ва хуш аст.

Ёдовар мешавем, ки Криштиану Роналду ва Ҷорҷина Родригес аз соли 2016 инҷониб бо ҳам муносибати ошиқона доранд ва дар суҳбатҳои хос футболбоз ӯро ҳамсарам мегуфт. Онҳо якҷоя панҷ фарзандро ба воя мерасонанд, ки танҳо дутоашро маҳз Ҷорҷина Родригес ба дунё овардааст.

Dialog.tj