Тасвири девории нав дар Майдони инқилоби шаҳри Теҳрон ба намоиш гузошта шуд. Ин тасвири қаҳрамонии миллии Эрон - Рустам дар мубориза бо аждаҳои чандсар аст, ки ҳамчун рамзи муқовимат бар Иёлоти Муттаҳидаи Амрико тасвир шудааст. Мақомоти эронӣ ин тасвирро рамзи муқовимат бар зидди Иёлоти Муттаҳидаи Амрико муаррифӣ кардаанд.

Дар болои ин деворнигора бо ин мазмун “Бихон ба номи Эрон, ки душманшикан аст” навишта шудааст.

Ин шеъри рамзӣ ба сабку забони “Шоҳнома”-и Ҳаким Абулқосими Фирдавсӣ, ҳамосасарои эронӣ таълиф шуда, бо муҳтавои миллӣ, қаҳрамонӣ ва муқовимат ҳамоҳангии рамзӣ дорад.

Рустам яке аз шахсиятҳои асосии “Шоҳнома” ва рамзи ҷасорат, вафодорӣ ва неруи миллист, ки дар баробари душманону девҳо ва хиёнаткорон мубориза мебарад. Дар ин рӯнамо муборизаи Рустам бо аждаҳо ба таври рамзӣ муқовимати Эрон бар зидди Амрикоро таҷуссум мекунад.

Дар поёни деворнигора ин ҷумла аз суханони роҳбари Инқилоби Эрон Оятуллоҳ Хоманаӣ навишта шудааст: “Худои мутаол нусратро барои миллати Эрон тазмин кардааст”. Ин суханонро роҳбари Эрон Оятуллоҳ Хоманаӣ дар охирин мулоқоташ бо мақомоти судии ин кишвар баён карда буд.

Ин деворнигора ё тасвир дар шароите рӯнамоӣ шуд, ки танишҳои сиёсӣ ва идеологӣ миёни Эрон ва Иёлоти Муттаҳидаи Амрико боз ҳам афзоиш ёфт. Иёлоти Муттаҳида дар чанд соли ахир бар зидди Эрон таҳримҳои густурдаи иқтисодӣ, аз ҷумла дар бахшҳои нафт, бонкдорӣ ва ҳатто доруворӣ ҷорӣ кард.

Хуруҷи Доналд Трамп аз созишномаи атомӣ ва амалӣ кардани сиёсати фишори максималӣ назари мардуми Эронро нисбат ба сиёсатҳои Амрико тағйир додааст.

Ҳузури густурдаи Амрико дар Ховари Миёна, ҳампаймонӣ бо Исроил дар ҷангҳои Ғазза, Лубнон ва Эрон нигарониҳоро бештар кардааст.

Dialog.tj