Маҷид Тахтравончӣ, муовини сиёсии Вазорати корҳои хориҷии Ҷумҳурии Исломии Эрон дар изҳороти тозаи худ гуфт, ки дар даври 4-уми  музокирот бо Амрико ҳанӯз масъалаи маҳдуд кардани ғанисозии уранро баррасӣ накардаанд.

Қаблан, расонаҳои аврупоӣ аз пешниҳоди нақшаҳое вобаста ба маҳдуд кардани ғанисозӣ ва ворид кардани урани ғанишуда барои истифодаи неру хабар дода буданд. Маҷид Тахтравончӣ ба ин хабарҳо вокуниш нишон дод ва дар суҳбат бо расонаи “Тасним” гуфт: “Мо ҳамчун як чорчӯб эълон кардаем, ки барои як муддати муайян метавонем яксилсила маҳдудиятҳоро дар робита бо сатҳу иқтидори ғанисозӣ ва масъалаҳои вобаста ба соҳаи атомӣ ҳамчун иқдомҳои эътимодсоз бипазирем”.

Ӯ, ҳамчунин, пешниҳоди кишварҳои кафил дар созиши эҳтимолиро рад карда, таъкид кард, ки машаваратҳо бо дӯстони ҳукумати Эрон, аз ҷумла Русия ва Чин идома хоҳад ёфт.

Муҳаммад Исломӣ, раиси Созмони атомии Эрон рӯзи сешанбе эълон кард, ки масъалаи қатъи ғанисозии уран “қобили музокира ва муомила” нест.

“Санъати атомӣ нуқтаи тавоноӣ ва сарвати миллии Эрон аст ва на қобили муомила ва на қобили музокира аст. Эрониҳо барои расидан ба ин илм баҳои гарон пардохтаанд ва роҳи идомаи он рӯшан ва шаффоф мебошад”.

Вазири корҳои хориҷии Ҷумҳурии Исломии Эрон Аббос Ироқчӣ низ дар хусуси пешниҳодҳои қатъи ғанисозии уран гуфта буд, ки он хати сурхи Эрон дар музокирот бо Амрико аст.

Стив Уиткофф қабл аз оғози даври чоруми музокироти Амрико бо Эрон гуфта буд, ки Эрон бояд Барномаи ғанисозии урани худро комилан қатъ карда, муассисаҳои ғанисозиро барчинад. Ӯ дар суҳбат бо расонаҳо чунин таъкид карда буд: “Онҳо бояд муассисаҳои ғанисозии худро барчинанд. Ҳамаи маводи сӯхтро бояд ба шакли камфаъолият дароранд ва ба маконе дурдаст фиристанд. Агар мехоҳанд барномаи атомии ғайрнизомӣ дошта бошанд, онро бояд комилан ғайринизомӣ кунанд”.

Ин дар ҳолест, ки чанде қабл Алӣ Лориҷонӣ, мушовири роҳбари Эрон ва узви Маҷлиси ташхиси низоми Эрон гуфта буд, “ин ки фишорҳо бар мо зиёд шудаанд, инкорнопазир аст. Ҳарчанд мегӯянд, ки мо дар ҳоли музокираем, фишорҳои иқтисодиро фаромӯш намекунанд ва ҳамчунон рафтори бенизом доранд. Ҳар рӯз як ҳарфи нав мезананд”.

Dialog.tj