Исмоил Бақоӣ, сухангӯи Вазорати корҳои хориҷии Ҷумҳурии Исломии Эрон гуфт, аз ҳар кишваре, ки бар зидди Эрон ҳамлаи низомӣ сурат гирад, Эрон ба он кишвар ҳамла хоҳад кард. Ӯ гуфт, ки чунин вокуниш бар асоси ҳуқуқи байналмилалӣ гирифта хоҳад шуд. Исмоил Бақоӣ афзуд, ки Эрон дар дифоъ аз худ ҳеч шакке надорад.

Исмоил Бақоӣ рӯзи душанбе, 5-уми апрел дар нишасти матбуотӣ гуфт, ки агарчи Эрон мехоҳад бо кишварҳои минтақа, махсусан бо ҳамсоягон муносибати хуб дошта бошад, аммо дар сурати анҷом нагирифтани ҳар гуна ҳамла аз хоки як кишвари сеюм ба Эрон, он нуқта дар доираи ҳуқуқи байналмилал мавриди ҳамла қарор дода хоҳад шуд.

Ин изҳорот дар шароите садо медиҳад, ки танишҳои амниятӣ дар минтақа, махсусан вобаста ба Исроил ва таҳаррукоти Иёлоти Муттаҳида афзоиш ёфтаанд. Дар ҳафтаҳои ахир Теҳрон ва Вашингтон се даври музокироти атомӣ анҷом доданд ва даври чоруми ин музокирот, ки бояд рӯзи 3-уми май баргузор мешуд, ба таъхир гузошта шуд. Ин таъхир боиси ба вуҷуд омадани фазои ноустувор шудааст.

Исмоил Бақоӣ бо радди иддаоҳо дар хусуси нақши Эрон дар минтақа гуфт: “Эрон дар минтақа на намоянда дорад ва на ниёз ба намоянда. Намояндаи як қудрати дигар дар минтақа Исроил аст, ки мутаассифона минтақаи моро ба ноамнӣ ва сесуботӣ кашидааст”.

Сухангӯи Вазорати корҳои хориҷии Эрон дар бахши дигари изҳороти матбуотиаш дар хусуси Барномаи атомии Эрон ва фишорҳои байналмилалӣ гуфт: “Агар хостаҳои Амрико ин аст, ки Эрон бомбаи атомӣ надошта бошад ва дар ин замина росткорӣ вуҷуд дошта бошад, бисёре аз масоил қобили ҳал аст”.

Президенти Амрико Доналд Трамп дар тозатарин изҳороти худ гуфт, ки ИМА фақат дар ҳолате мувофиқа хоҳад кард, ки Барномаи атомии Эрон ба таври комил барчида шавад. Ӯ афзуд, ки омодааст, назари Эронро дар хусуси барномаи атомии ғайринизомӣ ва сулҳомези Эрон бишнавад.

Dialog.tj