Вазири корҳои хориҷии Ҷумҳурии Исломии Эрон Аббос Ироқчӣ гуфт, ки барои поёни таҳримҳо ва эҷоди фазои эътимод Барномаи атомии Эрон то абад сулҳомез боқӣ хоҳад монд.

Аббос Ироқчӣ гуфт, ки мавқеи Ҷумҳурии Исломии Эрон барои ёфтани роҳи ҳал барои Барномаи атомии Эрон аз тариқи музокира тағйир наёфтааст.

Вазири корҳои хориҷии Ҷумҳурии Исломии Эрон, ки дар се давраи музокироти Амрико бо Эрон ширкат намуд, дар саҳифаи худ дар шабакаи иҷтимоии “Х” чунин навишт: “Дар воқеъ, мо беш аз ҳар замони дигаре мусаммам ба дастёбӣ ба як созише, ки поёни таҳримҳоро таъмин кунад ва дар хусуси ин ки Барномаи атомии Эрон барои ҳамеша сулҳомез боқӣ монад, эътимодсозӣ кунад, зимни он ки тазмин шавад, ҳуқуқи Эрон ба таври комил риоят хоҳад шуд”.

Ин изҳороти Аббос Ироқчӣ дар ҳоле нашр мешавад, ки даври чоруми музокироти атомии Эрон, ки бояд дар Рим баргузор мешуд, ба таъхир афтодааст. Аббос Ироқчӣ дар пайи таъхир ва тавфиқи музокироти атомӣ эълон кард, ки дар “ҳамоҳангӣ бо мақомҳои Уммон ва амрикоӣ” тасмим ба тавқифи давраи чоруми музокироти атомӣ гирифта шуд. Ӯ сабаби тавқифи давраи чоруми музокиротро “техникӣ ва логистикӣ” тавсиф кард.

Расонаҳо чанде қабл навиштанд, ки музокироти даври чоруми атомии Эрон бо Амрико ба таъхир гузошта шудааст.  Давраи чоруми музокироти Эрон ва Амрико бояд дар Рими Италия бо миёнравии Уммон баргузор мешуд.

Ба таъхир гузошта шудани музокироти атомии Эрон ва Амрико дар ҳолест, ки дар Кохи сафед тағйироти кадрӣ сурат гирифт. Доналд Трамп ду мақоми аршади ҳукуматашро барканор кард. Президенти Амрико Майкл Уолтз, мушовири амнияти миллии Амрикоро барканор ва ба ҳайси намояндаи доимии Созмони Милали Муттаҳид таъйин кард. Марко Рубио, вазири корҳои хориҷии Амрико муваққатан ба ҳайси мушовири амниятии Амрико таъйин шуд ва ҳамзамон вазифаи Вазири корҳои хориҷии Амрикоро бар уҳда дорад.

Dialog.tj