Вазири корҳои хориҷии Ҷумҳурии Исломии Эрон дар суҳбат бо телевизиони “RT” (Russia Today)  ба шарҳи сиёсати феълии минтақа ва таҳдидҳои низомӣ пардохт. Ӯ бо таъкид ба аҳамияти хирад ва таҳаммул дар муқобила бо фишорҳои хориҷӣ гуфт, ки эҳтимоли амалӣ гардидани таҳдидҳои низомӣ дур аз воқеият аст.

Аббос Ироқчӣ, ки бо як сафари хориҷӣ ба Федератсияи Русия рафта буд, дар суҳбат бо хабарнигори “RT” гуфт: “Ман чунин эҳтимолро, ки таҳдидҳои низомӣ ба амал табдил ёбанд, ҷиддӣ намегирам. На аз сӯйи Исроил ва на аз сӯйи дигар кишварҳо. Ин таҳдидҳо беш аз он ки воқеӣ бошанд, як навъ ҷангҳои равонӣ ва фишори сиёсӣ ба шумор мераванд”.

Вазири корҳои хориҷии Ҷумҳурии Исломии Эрон афзуд, ки Эрон таҷрибаи кофӣ дар муқобила бо таҳдидҳоро дорад ва дар гузашта низ бо иродаи миллӣ ва хирадгароӣ тавониста буд, аз мушкилот гузашта фишорҳоро паси сар кунад.

“Фишорҳои сиёсии ахир идомаи сиёсати фишори ҳадди аксар аст, ки ҳанӯз дар давраи президенти пешини Амрико Доналд Трамп оғоз гардида буд. Аммо ҳоло маъмурияти ҷадид бо роҳбурди нармтар ва бо усули гуногун талош дорад Эронро зери фишор қарор диҳад. Ҳоло ба ҷои таҳримҳои умумӣ бештар аз таҳримҳои ҳадафманд ва фишорҳои ҷаҳонӣ истифода мешавад”.

Дар бахши дигари суҳбаташ Аббос Ироқчӣ гуфт, ки робита бо кишварҳои минтақа ва ҳамсоягон як роҳи муҳим ва муассир барои муқовимат бо фишорҳои байналмилалӣ аст.

“Бидуни шак тақвияти робитаҳои минтақавӣ ва густариши ҳамкорӣ бо кишварҳои ҳамсоя метавонад моро аз вобастагӣ ба Аврупо раҳо кунад ва заминаи сиёсати фаъол ва мустақилро фароҳам намояд. Иттиҳод ва иқтидори дохилӣ бояд меҳвари сиёсати хориҷии кишвар қарор гирад”- афзуд Аббос Ироқчӣ.

Аббос Ироқчӣ солҳои тӯлонӣ дар маркази сиёсати хориҷии Эрон қарор дошт ва нақши калидӣ дар музокираи созиши атомӣ бо қудратҳои ҷаҳонӣ  бозидааст, ки ҳамеша ба истифода аз дипломатия ва гуфтугӯ таъкид мекунад. Ӯ бо истифода аз таҷрибаи худ дар дипломатия чунин меафзояд:

“Дар ҳар шароите, ки агар ирода ва хирад дар маркази тасмимгирӣ қарор гирад, роҳ барои ҳалли мусолиматомези баҳсҳо боз хоҳад монд. Ҳамеша ҷанг охирин ва шикасти ҳама роҳҳо аст”.

Dialog.tj