Дар шаҳри Алмаато маҷлиси Шурои вазирони корҳои хориҷии кишварҳои Иттиҳоди Давлатҳои Мустақил идома дорад. Дар ин хусус, ВАО-и Қазоқистон хабар медиҳанд.

Субҳи имрӯз дар шаҳри Алмаато барномаи бомуҳтавои вазирони корҳои хориҷии кишварҳои аъзои Иттиҳоди Давлатҳои Мустақил оғоз шуд. Дар иҷлосияи мазкур вазирони ҳама кишварҳои узви Созмон ширкат доранд.

Сарвазири Қазоқистон Мурат Нуртлеу дар оғози нишаст таъкид кард, ки соли 2025 ба 80-солагии Ғалаба рост меояд. Ӯ афзуд:  “Қазоқистон дар солҳои Ҷанг ба “пуштибони стратегии муҳим табдил ёфта буд. Дар он замон 1, 2 миллион сарбоз ба фронт рафтанд ва беш аз 5 миллион тонна гандуму 800 ҳазор тонна гӯшт барои ҳимояти ҷабҳа фиристода шуд”.

Қабл аз оғози нишаст сарвазири Қазоқистон Мурат Нуртлеу ва Сергей Лавров, вазири корҳои хориҷии Федератсияи Русия мулоқот намуда, иҷрои созишномаҳои дар сатҳи баланд бадастомадаро баррасӣ намуданд. Дар поёни мулоқот роҳбарони вазорати корҳои хориҷии кишварҳо ба “Оташи абадӣ” дар “Боғи 28-и Гвардиячии Панфилов” гулчанбар гузоштанд.

Хабарнигори қазоқ - Индира Унгарбоева гузориш дод, ки ҳоло боз як мулоқоти муҳимми дигар дар формати “Осиёи Марказӣ - Русия” дар ҳоли амалӣ шудан аст. Дар меҳвари гуфтугӯ рушди робитаҳои иқтисодиву тиҷоратӣ, логистикаи нақлиётӣ, лоиҳаҳои фарҳангӣ ва албатта масъалаҳои амният қарор дорад.

Дар нишасти вазирони корҳои хориҷии кишварҳои аъзои ИДМ як қатор санадҳои муҳимми ҳамкории вобаста ба Ҷанги Бузурги Ватанӣ ба имзо хоҳад расид.

Сергей Лебедев, дабири кулли ИДМ дар суҳбат бо расонаҳо гуфт, ки дар нишасти мазкур 17 санад баррасӣ шуда, 6-тои он барои баррасии роҳбарони кишварҳо пешниҳод мегардад. Аз ҷумла, пешниҳод дар хусуси додани унвони фахрии “Шаъну шарафи меҳнатии солҳои 1941-1945” матраҳ шудааст. Гуфта мешавад, ки ин санад то рӯзи 9-уми октябр бояд ба имзо расад.

“Айни ҳол, ҳайати кишварҳо ба муҳокима дар формати васеъ гузаштанд. Аз ҷумлаи мавузъҳои асосӣ – тарҳи Барномаи таҳкими амнияти сарҳадии кишварҳои ИДМ барои солҳои 2026-2030 ва рушди ҳаракати давталабона дар сатҳи Иттиҳод аст.

Dialog.tj