Намояндаи ҳукумати гурӯҳи террористии Толибон дар вилояти Бомиён, ки бо фасоду зулм бар зидди мардум шуҳрат ёфтааст, сиёсатҳои табъизомезро бар алайҳи ақвоми дигар, бахусус тоҷикон дар ин минтақа пеш гирифтааст.

Расонаҳои афғонистонӣ бо такя ба сарчашмаҳои худ дар вилояти Бомиён навиштаанд, ки раиси таъинкардаи Толибон дар вилояти мазкур аризаҳои пешниҳоднамудаи тоҷикон барои корро пора намуда ва монеи фаъолияти кории онҳо дар идораҳои давлатӣ мешавад.

Тибқи гузориш Абдуллоҳ Сарҳадӣ, раиси вилояти Бомиён амалан роҳро ба рӯйи тоҷикони Бомиён баста ва онҳоро аз ҳаққи кор дар идораҳои давлатӣ маҳрум кардааст. Сокинони вилоят гуфтаанд, ки раиси вилояти Бомиён зимни дархости кор тоҷиконро таҳқир намуда, ошкоро эълон кардааст, ки онҳо дар ҳукумати Толибон ҷое надоранд. Ӯ вазифа ва корҳои муҳимро ба афроди мавриди эътимоди худ, аксаран паштунҳо вогузор намудааст.

Сокинони Бомиёни Афғонистон, бахусус тоҷикон аз ин вазъият бисёр норозӣ мебошанд. Бузургони қавми тоҷик ҳушдор додаанд, ки идомаи чунин вазъият боиси ба вуҷуд омадани эътирозҳои густурдаи мардумӣ мешавад.

Dialog.tj