Раиси Кумитаи умури сиёсӣ ва робитаҳои оммавии Ҷабҳаи озодии Афғонистон Довуд Ноҷӣ гуфт, барномаҳои Намояндагии Созмони Милали Муттаҳид оид ба кумак ба Афғонистон (UNAMA) ва бархе созмонҳои хориҷӣ бештар ба таҳкими ҳукумати роҳбари Толибон Мулло Ҳайбатуллоҳ меанҷомад.

Ӯ гуфтааст, ки аз ибтидо маълум буд, ки муомила бо гурӯҳи Толибон роҳи нодуруст аст ва ҷомеаи ҷаҳонӣ, минтақа ва Афғонистонро ба ҳадаф намерасонад. Ба гуфтаи ӯ, ЮНАМА (UNAMA) бештар иқдомҳое анҷом медиҳад, ки ба манфиати Толибон аст. 

Довуд Ноҷӣ чанде қабл дар шабакаи иҷтимоии “Х” дар вокуниш ба раиси ЮНАМА дар Афғонистон Роза Отунбоева навишт: “Мутаассифона, дар он замон гӯши шунаво вуҷуд надошт ва илова бар он ки фурсати зиёде аз даст рафт, сиёсати “системаи норӯшан ва бемор” –и ЮНАМА ва ҷаҳон боиси тақвияти Мулло Ҳайбатуллоҳ ва таҳкими бештари ӯ шуд”.

Ӯ таъкид кард, ки ЮНАМА ва СММ бештар ба дунболи муомилаи ҷаҳон бо гурӯҳи Толибон буд, дар ин роҳ кӯшиш кард ва то ҳол ба натиҷаи мавриди назараш нарасидааст.

Ӯ бо ишора ба изҳороти ахири роҳбари ЮНАМА Роза Отунбоева гуфт, ҳоло замони он расидааст, ки бархе кишварҳои минтақа низ ба ин воқеият эътироф кунанд.

“Эътироф бояд пеш аз он сурат гирад, ки “аждаҳои терроризм” заҳри марговари худро ба тамоми минтақа наафканад”- гуфтааст Довуд Ноҷӣ.

Вокуниши фаъоли сиёсии Афғонистон Довуд Ноҷӣ дар пайи суханронии Роза Отунбоева дар нишасти ахири Шурои Амнияти СММ сурат мегирад. Роза Отунбоева дар нишасти мазкур гуфт, ки “муомилаҳои сиёсӣ бо гурӯҳи Толибон то ҳол натиҷа надодааст ва фазои муомила бо ин гурӯҳ маҳдудтар мешавад”.

Dialog.tj