Нишасти Шурои амнияти Созмони Милали Муттаҳид, ки рӯзи гузашта баргузор гардид, нигарониҳои афзояндаи ҷомеаи байналмилалӣ дар хусуси муносибат бо гурӯҳи террористии Толибон ва ояндаи Афғонистонро нишон медиҳад.

Роза Отунбоева, намояндаи махсуси Созмони Милали Муттаҳид дар умури Афғонистон зикр кард, ноумедии афзоянда дар байни баъзе аз ҷонибҳои муҳимми байналмилалӣ вуҷуд дорад, зеро ҳамкории сиёсӣ бо Толибон самара намедиҳад. Ӯ гуфт, ки чунин сиёсат боиси тақвияти ифротгароён дар дохили ин гурӯҳ шуда метавонад.

Роза Отунбоева таъкид кард, ки гурӯҳи террористии Толибон уҳдадориҳои байналмилалии Афғонистонро ба шакли интихобӣ иҷро мекунанд ва баъзеи онҳоро ҳамчун дахолат ба ҳокимияти миллӣ рад менамоянд.

Дар ин нишаст намояндаи Иёлоти Муттаҳидаи Амрико Дороси Шей таъкид кард, ки Толибон бояд уҳдадориҳои худро дар мубориза бо терроризм иҷро кунанд. Ӯ гуфт, ки Иёлоти Муттаҳидаи Амрико ба нияти неки Толибон -раванди музокироти Давҳа шубҳа дорад. Дороси Шей гуфт, Амрико наметавонад ба гурӯҳе, ки шаҳрвандони амрикоиро ғайриқонунӣ боздошт ва ба ҳуқуқи мардумаш эҳтиром намегузорад, эътимод кунад.

Намояндаи Федератсияи Русия Василий Небензя дар ин нишаст гуфт, ки кишвараш ҷонибдори як равиши воқеӣ ва бо мувозинат нисбат ба Афғонистон аст, ки бояд бо ҳамкории амалгароёна ва гуфтугӯи сабурона бо онҳо идома ёбад. Ӯ гуфт, ки кӯшишҳои водор кардани Толибон бо роҳи қатъи кумакҳои башадӯстона ба мардуми одии Афғонистон зарар мерасонад.

Намояндаи Чин дар нишасти Шурои амнияти СММ ба идомаи ҳамкорӣ бо гурӯҳи террористии Толибон таъкид намуд ва пешниҳод кард, ки манъи сафар барои ин гурӯҳ бекор карда шавад. Ӯ гуфт “Толибон бояд ҳуқуқи занонро эҳтиром кунанд ва бо ҳама гурӯҳҳои террористӣ, аз ҷумла ДОИШ, Ал-қоида ва Ҳизби Туркистони Шарқӣ мубориза баранд”.

Дар ҷараёни ин гуфтугӯҳо маълум шуд, ки ҷомеаи байналмилалии Афғонистон ҳанӯз дар масъалаи Афғонистон дидгоҳи муштрак надорад ва ихтилофҳо зиёданд.

Dialog.tj