Фармони нави Доналд Трамп, президенти Иёлоти Муттаҳидаи Амрико, ки оид ба манъ кардани сафар ба ин кишвар аст, эҳтимоли ворид шудани шаҳрвандони Афғонистон ва Покистон ба хоки Амрикоро маҳдуд кунад. Расонаи “Рейтерз” менависад, ки ҳафтаи оянда бо иҷроӣ шудани ин фармон вуруди шаҳрвандони ин кишварҳо ба Амрико манъ хоҳад шуд.

Се манбаъ аз ҳукумати Амрико ба “Рейтерз” гуфтаанд, шаҳрвандони кишварҳои дигар низ метавонанд ба ин рӯйхат шомил шаванд, ки боиси маҳдудиятҳои сафар ба Амрико хоҳад шуд.

Президенти пешини Амрико Ҷо Байден дар замони президентиаш маҳдудиятҳои ворид шудани хориҷиён ба Амрикоро бекор намуда, гуфта буд, ки он “як доғ дар виҷдони миллӣ” аст.

“Афғонҳое, ки барои сафари дубора визаҳои махсус гирифтаанд, эҳтимолан аввал зери таҳқиқоти сахт қарор хоҳанд гирифт” – зикр намудааст як манбаъ ба “Рейтерз”.

Ин манбаъ таъкид кардааст, дафтари Вазорати корҳои хориҷии Иёлоти Муттаҳидаи Амрико, ки назорати сафари дубораи афғонистониҳоро ба уҳда дорад, талош мекунанд, ки барои дорандагони визаҳои махсус иҷозат гиранд: “Аммо эҳтимоли гирифтани чунин иҷозат кам ба назар мерасад”.

Қаблан, “Рейтерз” аз қавли сарчашмаҳои худ иттилоъ дода буд, ки ҳукумати Доналд Трамп ба дафтари интиқоли афғонҳо супориш додааст, ки фаъолияташро қатъ кунад. Тибқи гузориш, агар ин дафтар баста шавад, 200 ҳазор паноҳҷӯи афғонистонӣ имкони ба Амрико рафтанро аз даст хоҳанд дод.

Dialog.tj