Гузоришгари махсуси Шурои ҳуқуқи башари Созмони Милали Муттаҳид Ричард Беннет чанд рӯз қабл дар хусуси вазъияти ҳуқуқи башар дар Афғонистон гузориш дода, таъкид кард, ки гурӯҳи террористии Толибон аксаран занони тоҷику ҳазораро боздошт ва шиканҷа мекунанд.

Қорор аст ин гузориши Ричард Беннет дар нишасти 56-уми Шурои ҳуқуқи башари Созмони Милали Муттаҳид хонда шавад. Дар гузориш ба поймолшавии густурдаи ҳуқуқи башар, ҳуқуқи занон, қатлҳои саҳроӣ дар сояи ҳукумати Толибон ишора мешавад.

Бар асоси ин гузориш, Толибон аз моҳи январи соли 2023, ки гузориши қаблии Ричард Беннет нашр шуд, то моҳи марти соли 2024  бар зидди занон, омӯзиш, созмонҳои имдодрасон ва фаъолиятҳои ҳуқуқи башар 24 дастури ҷадид содир кардаанд. Дастурҳои содиркардаи Толибон ба буҳрони инсонӣ дар ин кишвар доман задааст.

Дар гузориши Ричард Беннет таъкид мешавад, ки дар моҳи январи соли 2023 гурӯҳи террористии Толибон бо содир кардани фармон фаъолияти созмонҳои ғайридавлатии хориҷиро, ки дар заминаи барномаҳои омӯзишӣ фаъолият мекарданд, боз дошта ва ҳузури занон дар барномаҳои радиоӣ ва телевизиониро дар канори муҷриёни мард манъ кардаанд.

Тибқи гузориш, роҳбари Толибон дар моҳи январи соли 2023 бо як дастур манъи фаъолияти ороишгоҳҳои занонаро дар тамоми Афғонистон содир кард. Ба дунболи он, фаъолият ва кори занон дар давлат ва созмонҳои ғайридавлатӣ куллан манъ шуд.

Ричард Беннет гузориш додааст, ки занон ва духтарони Афғонистон аксаран ба иттиҳоми мухталиф, аз ҷумла риоя накардани ҳиҷоби иҷборӣ боздошт мешаванд. Бештарини боздоштҳо дар минтақаҳое сурат мегирад, ки дар он ҷо аксарияти тоҷик ва ҳазораҳо зиндагӣ мекунанд.

Дар гузориши қаблии Ричард Беннет ба боздоштҳои ҳадафмандонаи занони тоҷику ҳазора дар шаҳри Кобул ишора шуда буд.

Ричард Беннет дар бахши дигари гузориши худ таъкид кардааст, ки дастгоҳи судии гурӯҳи террористии Толибон тамоми судяҳо ва коркунони омӯзишдидаи ниҳодҳои судиро ихроҷ ва ба ҷойи онҳо “муллоҳои бе салоҳияти қонунӣ ва бо дарки маҳдуд аз шариат” – ро ҷойгузин кардаанд.

“Толибон бо ниҳодина кардани ситами ҷинсиятӣ ба нигаришҳои занситезона машруияти бештаре бахшидаанд. Аз ҷумла, сохторҳои қудрат тамоман мардона аст, ки як системаи судии ғайрирасмӣ ба шумор меравад”- гуфтааст Ричард Беннет.

Дар бахши дигар Ричард Беннет аз қатлҳои ҳадафманди гурӯҳи Толибон ёд кардааст, ки аксаран қурбониёни он занон, кормандони давлати пешин, судҳо ва донҷишҷӯён мебошанд.

“Ин қатлҳо дар хонаҳои ин афрод, маконҳои умумӣ ва боздоштгоҳҳо рӯх додааст ва қурбониён умуман дифоъгарони ҳуқуқи башар, вакилон, додситонҳо, судҳо, донишҷӯён, муаллимон, афсарони полис ва бисёре аз онҳо занон ҳастанд”- гуфтааст Ричард Беннет.

Dialog.tj