Дабири кулли Созмони Милали Муттаҳид Антониу Гутерриш дар гузориши ҷадиди худ тасдиқ намуд, ки гурӯҳҳои мусаллаҳи зидди Толибон дар давоми се моҳи гузашта 91 ҳамлаи мусаллаҳона бар зидди ин гурӯҳи террористӣ анҷом додаанд.

Бар асоси гузориш, Ҷабҳаи муқовимати миллии Афғонистон 53 маротиба ва Ҷабҳаи озодии Афғонистон 21 маротиба бар зидди Толибон амалиёти мусаллаҳона анҷом додаанд. Инчунин, Ҷабҳаи иқтидори мардум низ як ҳамла анҷом додааст.

Раҳбарии Ҷабҳаи иқтидори мардумро баъзе аз вакилон ва мансабдорони ҳукумати пешини Афғонистон ба уҳда доранд.

Дар гузориш таъкид шудааст, ки масъулияти 16 ҳамлаи дигарро то ба ҳол ҳеч гурӯҳе ба уҳда нагирифтааст.

Дар гузориши Антониу Гутерриш, дабири кулли СММ зикр шудааст, ки мухолифони Толибон дар се моҳи гузашта Вазорати корҳои дохилии Толибон дар Кобул ва пойгоҳи низомии Багром дар вилояти Парвонро мавриди ҳадаф қарор додаанд. Масъулияти ҳамла ба Вазорати корҳои дохилии Толибон дар Кобулро, ки рӯзи 29-уми декабри соли 2024 сурат гирифт, Ҷабҳаи муқовимати миллии Афғонистон бар уҳда гирифта буд.

Дар гузориши Дабири кулли  Созмони Милали Муттаҳид, ҳамчунин, таъкид шудааст, ки то охири моҳи январи соли 2025 фақат 3,5 фоиз кумакҳои муҳим барои мардуми Афғонистон таъмин  шудааст. Ин кумакҳо дар доираи “Барномаи ниёзҳои башардӯстона ва посух ба онҳо” барои соли 2025 барои расонидани кумак ба 16,8 миллион нафар ирсол шудааст.

Созмони Милали Муттаҳид гуфтааст, ки дар маҷмуъ 22, 9 миллион нафарро дар Афғонистон шиносоӣ кардаанд, ки ба кумакҳои фаврии башардӯстона ниёз доранд.

Тибқи гузориш, аз 242 миллиард доллари зарурӣ барои такмили барномаи мазкур, фақат 3,5 фоиз маблағ ҷамъоварӣ шудааст. Созмони Милали Муттаҳид дар доираи Стратегияи Созмони Милали Муттаҳид барои кумак ба Афғонистон аз солҳои 2023 то 2025 камтар аз 11%, яъне 2,53 миллиард доллари зарурӣ ҷамъоварӣ кардааст.

Ин дар ҳолест, ки буҳрони башардӯстона дар Афғонистон шиддат мегирад ва бисёре аз созмонҳои кумакрасон аз набудани маблағҳои кофӣ барои расонидани ёрӣ таъкид мекунанд.

Dialog.tj