Рӯзномаи “Телеграф” дар як гузориш таъкид кардааст, ки “апартоиди ҷинсӣ” –и Толибон монеи ҷарроҳии духтарони бемор дар ин кишвар мешавад.

Тибқи ин гузориш, духтарони Афғонистон маҷбур шудаанд, ба “дуоҳои динӣ ва доруҳои анъанавӣ”  рӯ оваранд. Дар бисёре аз ҳолатҳо ин навъи табобат ҳаёт ва саломатии онҳоро зери хатар қарор медиҳад.

Ин рӯзнома бо истинод ба маълумоти тиббии нав аз Афғонистон хабар додааст, ки зиёда аз 80% ҷарроҳиҳои анҷомшуда дар як маркази кӯдакона дар Кобул фақат барои писарон сурат гирифтааст.

Рӯзномаи мазкур ба воситаи мусоҳиба бо табибон фош кардааст, ки Толибон бо маҳдудиятҳои эҷоднамудаи худ монеи ҷарроҳии духтарони бемор шудаанд. Маҳдудиятҳои Толибон дастрасии духтарону занон ба хизматрасонии тиббиро мушкил кардааст.

Ин рӯзнома бо Гулнисо, як сокини ғарби Афғонистон суҳбат кардааст, ки шаҳвараш дар як муноқишаи оилавӣ дар деҳаашон кушта шудааст. Ӯ ба рӯзномаи “Телеграф” гуфтааст: “Духтари ҳаштсолаи ман сулфаи сахт дошт ва ман чан бор кӯшиш кардам, ки ӯро назди табиб барам. Ҳар вақте, ки дар канори роҳ меистодам, мунтазири мошин мешудам, то моро ба беморхона барад. Толибон назди ман меомаданд ва мепурсиданд, ки шавҳарат куҷост? Ман мегуфтам, ки ӯ мурда - кушта шудааст”. Гулнисо гуфтааст, ки Толибон суханони ӯро бовар намекарданд ва ӯро ба “дурӯғгӯӣ ва қасди гуноҳ” гумонбар менамуданд.

Дар қисмати дигари гузориши рӯзномаи “Телеграф” зикр шудааст: “Дар Афғонистони зери ҳукмронии Толибон бисёре аз касоне, ки барои духтаронашон аҳамият қоиланд, кишварро тарк намуданд ва онҳое ки боқӣ мондаанд, барои зинда мондан мубориза мебаранд.

Толибон бо қонунҳои сахгиронаашон ва маҳдудиятҳо бар зидди занону духтарон аз сӯйи ҷомеаи ҷаҳонӣ шадидан мавриди интиқод қарор гифтанд. Чанде қабл Вазорати корҳои хориҷаи Олмон дар баёнияе гуфт, ки Толибон барои занону духтарон дар Афғонистон “зиндони иҷтимоӣ” сохтаанд.

Dialog.tj