Вазорати корҳои хориҷии Олмон рӯзи сешанбе дар як баёния гуфт, ки гурӯҳи террористии Толибон Афғонистонро ба як “зиндони иҷтимоӣ” барои занону духтарони афғонистонӣ табдил додаанд.

Дар шаҳри Берлини Олмон бо ташаббуси занҳои фаъоли Афғонистон нишасте баргузор гардид ва дар он тасвирҳое аз саркӯб ва амалҳои зишти гурӯҳи террористии Толибон нишон дода шуд. Анналена Бербок, вазири корҳои хориҷии Олмон дар ин нишаст таъкид кард, ки ба садои занони Афғонистон гӯш хоҳад дод.

Дар ин нишаст гурӯҳе аз занони афғонистонӣ бо Анналена Бербок мулоқот намуда, аз вазъияти бади занони Афғонистон дар зери сояи ҳукумати Толибон гузориш доданд. Вазири корҳои хориҷии Олмон бо ишора ба маҳдудиятҳои ҷоринамудаи гурӯҳи террористии Толибон дар саҳифаи худ дар шабакаи иҷтимоии “Х” навишт: “Онҳо тирезаҳоро бо девор мепӯшонанд ва тасвирҳои занонро аз ҷойҳои ҷамъиятӣ ҳазф мекунанд.

Мо ба садои онҳо гӯш хоҳем дод ва бо фаъолони ҷомеаи шаҳрвандии Афғонистон дар бораи поймол кардани ҳуқуқи инсон машварат хоҳем кард.”

Дар ин нишаст ҷомеаи шаҳрвандии занони Афғонистон дар як изҳороти муштарак бо такя ба гузориши Пажуҳишгоҳи сулҳи Амрико таъкид карданд, ки Толибон аз 31-уми январи соли ҷорӣ то ба ҳол 138 қарор бар зидди занону духтарон содир кардаанд.

Дар изҳорот таъкид шудааст, ки ин қарорҳо сабаби маҳдуд кардани ҳуқуқи занон аз ҳаёти ҷамъиятӣ ва азият додани онҳо дар муҳити табъизи ҷинсиятии системавӣ гардидааст. Дар изҳороти ҷомеаи шаҳрвандии Афғонистон аз иқдомҳои Австралия, Канада, Олмон ва Нидерланд барои фишор овардан ба Толибон дар ҷиҳати қатъ кардани нақзи Конвенсияи рафъи ҳама гуна шаклҳои табъиз бар зидди занон ситоиш шудааст.

Таъкид шудааст, ки ин иқдоми кишварҳо метавонад сабаби боз шудани парванда бар зидди роҳбарони Толибон дар додгоҳи байналмилалии ГААГА шавад.

Ин дар ҳолест, ки моҳи октябри соли гузашта вазирони корҳои хориҷии Олмон, Австралия, Канада ва Нидерландия бо нашри як изҳорот Толибонро барои паймол намудани ҳуқуқи инсон, бахусус табъизи ҷинсӣ бар зидди занон маҳкум карда буданд.

Dialog.tj