Маҷмаи умумии Созмони Милали Муттаҳид қатъномаи пешниҳодкардаи Русия оид ба 80-умин солгарди хатми Ҷанги дуюми ҷаҳониро тасдиқ кард. Бар асоси ин қатънома Созмони Милали Муттаҳид  тасмим гирфтааст, ки маҷлиси тантанавии Маҷмаи умумии СММ-ро барои гиромидошти хотираи қурбониёни ҷанг баргузор намояд.

Қатъномаи мазкур бо иттифоқи райъ қабул гардид. Ин қатънома аз ҷониби Федератсияи Русия ва кишварҳои дигар, аз ҷумла Озарбойҷон, Арманистон, Беларус, Қазоқистон, Чин, Қирғизистон, Сербия, Тоҷикистон, Туркманистон, Ӯзбекистон, Кореяи Шимолӣ ва Эрон пешниҳод шудааст.

Василий Небензя, намояндаи доимии Русия дар Созмони Милали Муттаҳид қалан аз кишварҳои узви созмон даъват намуд, ки ин қатъномаро ҷонибдорӣ карда, бо ин кор ба хотираи ҳамаи онҳое ки барои ҷаҳони бидуни нажодпарастӣ ҷон нисор кардаанд, арҷ гузоранд.

Бар асоси қатъномаи қаблушуда Маҷмаи умумии СММ бояд дар ҳафтаи дуюми моҳи майи соли 2025 ҷаласаи хоси тантанавӣ баргузор кунад. Инчунин, пешниҳод шудааст, ки чунин ҷаласаҳо дар оянда ҳар панҷ сол баргузор гардад.

Қатъномаи мазкур ҳамаи кишварҳои узви Созмони Милали Муттаҳид, созмонҳои ғайриҳукуматӣ ва шахсони воқеиро даъват мекунад, ки рӯзҳои  8-9-уми майро ҳамчун ёдбуди қурбониёни Ҷанги дуюми ҷаҳонӣ гиромӣ доранд.

Дар қисми муқаддимавии қатъномаи Маҷмаи Умумӣ аз ҳамаи кишварҳои узви СММ даъват шудааст, ки аз таҳдиди истифодаи нерӯ ё истифодаи он дар муносибатҳои байналмилалӣ худдорӣ кунанд.

Ёдовар мешавем, ки қатъномаҳои Маҷмаи умумии СММ ҳолати тавсиявӣ дошта, иҷрои он барои ҳама кишварҳо ҳатмӣ нест.

Dialog.tj