Рӯзномаи шотландии “The Heraild” дар гузорише навишт, ки духтарони аъзо ва роҳбарони гурӯҳи террористии Толибон дар як мактаби хусусии ҳунарпешаи шотландӣ Дэвид Ҳейман таҳсил мекунанд. Ин мактаб дар шаҳри Кобул фаъолият мекунад.

Ин рӯзнома дар гузориши худ менависад, ки аъзо ва роҳбарони Толибон бо вуҷуди мамнуъ будани таҳсили духтарон дар Афғонистон, фарзандонашонро ба мактаби хусусие мефиристанд, ки аз сӯйи созмони хайриявии ҳунарпешаи шотландӣ Дэвид Ҳейман маблағгузорӣ мешавад.

Мактабе, ки дар он духтарони Толибон таҳсил мекунанд, аз сӯйи як шахси хориҷӣ мудирият мешавад. Рӯзномаи шотландӣ тасдиқ мекунад, ки мактаб аз сӯйи созмони хайриявии  “Sperit Aid” – и Дэвид Ҳейман идора мешавад ва ҳоло 80 хонанда, аз ҷумла писарону духтарон дар он таълим мегиранд.

Дэвид Ҳейман, ҳунарпешаи маъруфи шотландӣ ва асосгузори созмони хайриявии “Sperit Aid” дар суҳбат бо рӯзномаи “The Heraild”  дурӯягии Толибонро маҳкум намудааст.

“Толибон духтарони худро ба мактаби мо мефиристанд, дар ҳоле ки, дигар духтарони афғон аз ин ҳуқуқ маҳрум шудаанд”- таъкид мекунад Дэвид Ҳейман.

Дар гузориши рӯзномаи шотландии “The Heraild” мудири мактаби хайриявӣ Толибонро “мунофиқони лаънатӣ” хондааст.

Дэвид Ҳейман, ҳунарпешаи маъруфи шотландӣ ба воситаи бунёди хайриявияш ба номи “Sperit Aid” дар лоиҳаҳои мухталифи башардӯстона фаъолият мекунад. Ин муассиса илова бар пуштибонии хонандагони афғон, инчунин, аз таъмини хароҷоти таҳсили 30 духтари фаластинӣ низ хабар додааст.

Дэвид Ҳейман бо нигаронӣ аз вазъияти амнияти духтарони фаластинӣ гуфтааст: “Нисфи онҳо ҳоло бедарак шудаанд ва ё эҳтимолан кушта шудаанд. Мо ҳеч хабари дақиқе дар хусуси онҳо надорем. Ҳукумати мо бояд аз шарм сарашро хам кунад”.

Дэвид Ҳейман гуфтааст, дар ҳоли омода намудани намоишномае дар хусуси сарнавишти талхи занони Афғонистон аст. Заноне, ки ба гуфтаи ӯ “Акнун ҳамчун шаҳрванд ҳисоб намешаванд, наметавонанд дар хонаи худ биханданд ё суруд хонанд  ё таҳсили онҳо ба сатҳи ибтидоӣ маҳдуд шудааст”.

Хабари ба мактаб фиристодани духтарони аъзо ва роҳбарони Толибон дар ҳоле нашр мешавад, ки таҳсил барои тамоми духтарони Афғонистон бар асоси дастури раҳбари ин гурӯҳ манъ шудааст.

Гурӯҳи террористии Толибон ба дархости пай дар пайи кишварҳо ва созмонҳои ҷаҳонӣ дар хусуси боз кардани мактаб ва донишгоҳҳо посухи рад додаанд.

Dialog.tj