Бархе ВАО-и Афғонистон гуфтаанд, ки кишвари Ҳинд дар ҳоли гуфтугӯ барои вогузории сафорати Афғонистон ба дипломатҳои гурӯҳи террористии Толибон аст.

Тибқи иттилоъ, гурӯҳи террористии Толибон дар назар аст дар навбати аввал як ҳайати чанднафариро барои баррасии корҳо ба сафорати Афғонистон дар Деҳлӣ хоҳад фиристод.

Аммо ҳанӯз расман мушаххас нашудааст, ки Толибон киро ба унвони сафир ба Ҳинд мефиристанд. Бархе манобеъ мегӯянд, Наҷиб Шоҳин, писари Суҳайл Шоҳин ва Шавкат Аҳмадзай, чеҳраи наздик ба Толибон номзадҳои эҳтимолӣ ба вазифаи сафири Афғонистон дар Ҳинд мебошанд.

Тасмими Ҳинд барои супоридани сафорати Афғонистон дар Деҳлӣ ба гурӯҳи Толибон бо мухолифати дипломатҳои ҳукумати собиқи Афғонистон рӯ ба рӯ шудааст.

Ин дар ҳолест, ки дар охирҳои соли гузашта Аббос Стонекзай, муовини сиёсии Вазорати хориҷаи гурӯҳи террористии Толибон гуфта буд, Сайид Муҳаммад Иброҳим ва Закӣ Вардак, ду генерали консули Афғонистон дар Ҳинд бо Вазорати хориҷаи ин гурӯҳ ҳамкорӣ доранд ва сафорат ба зудӣ боз хоҳад шуд.

Сайид Муҳаммад Иброҳим дар он вақт бо нашри паёми савтӣ гуфта буд, ки бо дархости Ҳукумати Ҳинд масъулияти кори консули Афғонистон дар ин кишварро ба уҳда гирифтааст.

Закӣ Вардак бошад пас аз боздошт шуданаш дар майдони ҳавоии Деҳлӣ аз вазифаи худ истеъфо дод.

Ҳукумати Ҳинд қаблан як дипломати Толибон бо номи Икромиддин Камилро ба ҳайси консули Афғонистон дар шаҳри Мумбайни Ҳинд пазируфта буд.

Дар он замон Ҳайбатуллоҳ Ҳидоят, раиси радио ва телевизиони миллии гурӯҳи террористии Толибон дар саҳифаи худ дар шабакаи иҷтимоии “X” навишта буд, ки Икромиддин Комил, дипломати муаррифишуда аз сӯйи Толибон ба сифати консули Афғонистон дар Мумбайи Ҳинд ба кори худ оғоз кард.

Пас аз суқути ҳукумати Ашраф Ғанӣ ва рӯйи кор омадани гурӯҳи террористии Толибон дипломатҳои ин гурӯҳро бисёре аз кишварҳои дунё напазируфтанд. Созмони Милали Мутаҳид ва Иттиҳоди Аврупо ҳанӯз ин гурӯҳро ба расмият нашинохтаанд. Бархе кишварҳое, ки бо ин гурӯҳ равобити дипломатӣ ва сиёсӣ барқарор кардаанд, мегӯянд ин ба маънои ба расмият шинохтани Толибон нест.

Кишварҳои Осиёи Марказӣ, аз ҷумла Ӯзбекистон, Қирғизистон, Қазоқистон ва Туркманистон бо гурӯҳи террористии Толибон робитаҳои дипломатӣ, сиёсӣ ва иқтисодӣ барқарор кардаанд.

Тиҷорат миёни Ӯзбекистон ва гурӯҳи террористии Толибон дар соли гузашта ба беш аз 1 миллиард доллар афзоиш ёфтааст. Ин кишвар дар талош аст, ки лоиҳаҳои иқтисодии зиёдеро дар Афғонистон амалӣ кунад. Дидор ва гуфтугӯи Толибон ва мақомоти олии Ӯзбекистон тайи солҳои охир афзоиш ёфтааст.

Қазоқистон низ бо гурӯҳи Толибон равобити дипломатӣ ва иқтисодӣ барқарор кардааст. Бар асоси маълумоти ВАО тиҷорат миёни Қазоқистон ва Афғонистон беш аз 2 миллиард доллар ҳисоб шудааст. Ҳукумати Қазоқистон чанде қабл гурӯҳи Толибонро аз феҳристи гурӯҳҳои террористӣ дар ин кишвар ҳазф кард.

Ҷумҳурии Тоҷикистон ягона кишвар аз Осиёи Марказӣ аст, ки то ҳанӯз дар мавқеи худ устувор буда, борҳо эълон кардааст, шарти ба расмият шинохтани Толибон эҷоди ҳукумати фарогир аст, ки дар он ҳама ақвом саҳм дошта бошанд.

Dialog.tj