Президенти Иёлоти Муттаҳидаи Амрико Доналд Трамп бегоҳии рӯзи якшанбе, 9-уми феврал гуфт, интизори дидори рӯ ба рӯ бо Владимир Путин аст, то масъалаи ҷанги Украинаро ҳал кунад.

“Путин гуфт, ки мехоҳад дар вақти лозимӣ бо ман дидор кунад. Ба ҳамин далел, мо интизори он хоҳем буд ва бояд ба ин ҷанг поён диҳем” – гуфт Доналд Трамп.

Президенти Иёлоти Муттаҳидаи Амрико бо “ҳавлнок” хондани ҷанги Украина афзуд, ки агар ба ҷойи Ҷо Байден президенти Амрико мебуд, ҷанг асосан рух намедод.

Доналд Трамп дар ҳамоише дар штати Аризонаи Амрико зимни суханронӣ ба авлавиятҳои давраи дуюми президентиаш ишора карда, гуфт, ки бо амалӣ намудани барномаҳо “давраи тиллоӣ” –и Иёлоти Муттаҳидаи Амрико фаро хоҳад расид.

“Ба ҷанг дар Украина поён хоҳем дод ва ошӯб дар Ховари Миёнаро қатъ хоҳем кард ва пеши роҳи ҷанги сеюми ҷаҳонро хоҳем гирифт. Ин мавридҳоро қавл медиҳам” – гуфт Доналд Трамп.

Чанде қабл, Владимир Путин, президенти Федератсияи Русия низ гуфт, ки омодаи дидор ва гуфтугӯ бо Доналд Трамп аст. Владимир Путин гуфт, ки дар сурати анҷом ёфтани дидор ҳарфҳои зиёде барои гуфтугӯ хоҳанд дошт.

“Барои ин дар ҳар замон омодаам ва агар бихоҳад омодаи барпо намудани ин нишаст ҳастам” – зикр кард Владимир Путин. Президенти Федератсияи Русия дар идома таъкид кард, ки “Намедонем, чӣ замоне дидор хоҳем кард, зеро Доналд Трамп ҳеч чизе дар ин хусус намегӯяд ва ман аз 4 сол қабл абадан бо ӯ суҳбате надоштам. Ман омодаи ин дидор дар ҳар замоне ҳастам”.

Dialog.tj