Як ниҳоди бозрасии хоси молиявии Иёлоти Муттаҳидаи Амрико мегӯяд, ки қисмати зиёди кумакҳои молии ин кишвар ба Афғонистон ба дасти гурӯҳи террористии Толибон расидааст. Сигор – бозрасии хоси Иёлоти Муттаҳидаи Амрико оид ба бозсозии Афғонистон дар гузориши худ таъкид кардааст, ки пули андоздиҳандагони Амрико ба дасти гурӯҳи террористии Толибон расидааст.

Ҷон Сопко, бозраси вижаи Иёлоти Муттаҳидаи Амрико дар суҳбат бо телевизиони “Фокс-нюз” таъкид кард, ки “Бахши бузурге аз пулҳои молиётдиҳандагони амрикоӣ, ки ба ниҳодҳои Созмони Милали Муттаҳид дар Афғонистон фиристода шудааст, ба дасти Толибон афтодааст”.

Сигор зимни нашри гузорише дар соли гузашта хабар дода буд, ки Вазорати корҳои хориҷии Амрико пас аз хуруҷ аз Афғонистон ба ин кишвар 239 миллион доллар фиристодааст.

“Ду дафтар аз панҷ дафтари Вазорати корҳои хориҷа, ки дар соли 2022 ин пулҳоро барои муассисаҳои ғайридавлатӣ дар Афғонистон ирсол мекарданд, натавонистанд ба дурустӣ чигунагии харҷ шудани ин пулҳоро баррасӣ кунанд” – зикр мешавад, дар гузориши Сигор.

Доналд Трамп дар оғози президентиаш кумакҳои Иёлоти Муттаҳидаи Амрико ба Афғонистонро қатъ кард. Ӯ ниҳодҳои хориҷии кумакунандаи Иёлоти Муттаҳидаи Амрико дар хориҷи кишварро фасодзада хонда, барои муддати номуайян ҳама гуна кумакҳои хориҷиро манъ кард.

Dialog.tj