Сарвазири Маҷористон Виктор Орбан рӯзи душанбе таъкид кард, ки агар музокироти Украина бо Русия ҳарчӣ зудтар оғоз нашавад, Украина ба сарнавишти Афғонистон дучор хоҳад шуд.

Виктор Орбан таъкид кард, ки хатми ҷанг ниёзманди дипломатия аст ва Аврупо набояд ба идомаи ҷанг то вайронии комили Украина пофишорӣ кунад.

Ӯ аз зарурати оғоз намудани роҳҳои дипломатӣ барои поёни ҷанг таъкид кард ва афзуд, ки Аврупо аз идомаи низоъ дар Украина пуштибонӣ мекунад.

“Аврупоиҳо фикр мекунанд, ки музокира накардан амали ахлоқӣ аст, ин хандаовар мебошад” – гуфт Виктор Орбан.

Гуфта мешавад, ки Виктор Орбан аз сиёсатмадорони наздик ба Путин аст ва дар тӯли ҷанги ин ду кишвар борҳо аз Русия пуштибонӣ кардааст.

Виктор Орбан хитоб ба мухолифони музокира бо Русия дар Аврупо гуфт, ки “Ҷанг то нобудии комил идома хоҳад ёфт ва Украина ба Афғонистони Иттиҳоди Аврупо табдил хоҳад шуд”.

Вай таъкид кард, ки кишварҳои аврупоӣ вонамуд мекунанд, то пирӯзӣ дар Киев хоҳанд монд, вале “дар воқеъ ҳеч лутфе ба Украина намекунанд”.

 “Аз ҳамон ибтидо мушаххас буд, ки Украина наметавонад пирӯз шавад, магар ин ки мо як ҷанги фарогирро оғоз кунем. Аммо ин гузина ғайримумкин аст. Имрӯз танҳо чизе, ки метавонад ба Украина кумак кунад, оташбас ва сулҳ аст”- афзуд Виктор Орбан.

Сарвазири Маҷористон шарҳ дод, ки Аврупо ва Ҷо Байден, президенти собиқи ИМА дар заъиф кардани Русия аз тариқи ҷанги Украина шикаст хӯрданд ва натавонистанд Маскавро водор намоянд, ки аз мақсадҳои худ дар ҷанг даст кашад.

Виктор Орбан гуфтааст, ки Аврупо ба як раҳбари қавӣ ба мисли Доналд Трамп, президенти ИМА ниёз дорад, то вориди амал шавад. Ӯ ба Иттиҳоди Аврупо пешниҳод кард, ки ҳамаи монеаҳоро канор гузорад ва барои музокираву барқарории оташбас миёни Русия ва Украина талош кунад.

Қаблан, Виктор Орбан, сарвазири Маҷористон эълон карда буд, ки ҳукумати ӯ барои баргузор намудани ҷаласа ва музокираҳои Русия бо Украина омода аст. Ӯ изҳори умедворӣ кард, ки натиҷаҳои мусбат аз музокироти Русия бо Украина ба даст хоҳанд омад.

Чанде қабл Дмитрий Песков, сухангӯи президенти Русия гуфта буд, ки Маскав ҳамчунон омодаи гуфтугӯ бо Амрико аст, вале то кунун дар ин замина ҳеч дархосте аз Вашингтон дарёфт накардааст.

Dialog.tj