Рӯзномаи “Ню-Йорк-пост” иттилоъ медиҳад, ба санаде дастрасӣ пайдо кардаанд, ки нишон медиҳад, президенти Иёлоти Муттаҳидаи Амрико мақсад дорад барои мубориза бо “яҳудиситезӣ” ва “Ҳамос” қарори иҷроӣ қабул кунад.

Тибқи иттилои ин рӯзнома Доналд Трамп дар қарор ба ниҳодҳои федералӣ дастур хоҳад дод, роҳҳое барои депорти фаъолоне, ки ба “яҳудиситезӣ” машғуланд, пайдо кунанд.

Ин қарор Прокуратураи Иёлоти Муттаҳидаи Амрикоро вазифадор мекунад, ки ҳамагуна изҳори назар ва ҳимоят аз “Ҳамос” –ро мавриди баррасӣ ва тафтишоти ҷиноӣ қарор диҳад.

Бар асоси гузориши рӯзнома, раисони ниҳодҳои давлатӣ вазифадор ҳастанд, то муддати 60 рӯз пешниҳодҳои худро дар ин хусус ба Кохи сафед пешниҳод намоянд.

Дар чорчӯби қарори мазкур фаъолони ҷомеаи шаҳрвандие, ки ба фаъолиятҳои зиддисаҳюнистӣ мепардозанд, аз Иёлоти Муттаҳиди Амрико депорт хоҳанд шуд.

Бо гузашти як ҳафта аз давраи дувуми президентии Доналд Трамп вазъияти сиёсӣ ва иҷтимоии Иёлоти Муттаҳидаи Амрико ва ҷаҳон пурошӯб шудааст. Сиёсати хасмонаи Доналд Трамп бо шарикони роҳбурдии ИМА аз як сӯ, аз сӯйи дигар сиёсатҳои миллигароёнаи ӯ мавқеияти геполитикӣ ва геосиёсии Иёлоти Муттаҳидаи Амрикоро дар ҳолати бунбаст қарор додааст.

Бархе аз сарони кишварҳои Иттиҳоди Аврупо бо сиёсатҳои хориҷии Доналд Трамп қатъан мухолифат кардаанд. Дар садри ин кишварҳо, Фаронса ва Олмон қарор доранд.

Аз сӯйи дигар, пешниҳоди ӯ дар мавриди кӯчонидани фаластиниён аз минтақаи Ғазза ба кишвари дувум ва севум кишварҳои Халиҷи Форсро асабӣ кардааст. Президенти Миср пешниҳоди Доналд Трампро зулми таърихӣ дар ҳаққи мардуми Фаластин хонд ва таъкид кард, ки Ҷумҳурии Миср ба ин иқдоми золимона ҳамроҳ нахоҳад шуд.

Вазири корҳои хориҷии Эрон Аббос Ироқчӣ дар мусоҳиба бо телевизиони амрикоии “Скай-нюз” бо танз гуфт, ки Доналд Трамп ба ҷойи кӯчонидани мардуми Ғазза, Исроилҳоро ба ҷазираи Гриланд кӯчонад, то ҳам мушкили исроилҳо ҳал шавад ва ҳам масъалаи даъво бар сари ҷазираи Гриланд.

Dialog.tj