СААД рӯзи чоршанбеи ҳафтаи ҷорӣ гуфт, ки бо ҳамкории кишварҳои минтақа зимни гузаронидани ду амалиёти ҷудогона беш аз ду тонна маводи мухаддирро кашф ва мусодира кардааст.

Тибқи иттилои Созмон, дар як амалиёт 1 тоннаву 113 килограм ва дар амалиёти дигар 1 тоннаву 84 килограм маводи мухаддирро дар кишварҳои Осиёи Марказӣ ва Чин кашф ва мусодира кардаанд.

Ин Созмон эълон кард, ки гузориши солонаи фаъолияти мубориза бар зидди қочоқи маводир мухаддир ба Созмони Милали Муттаҳид ирсол гардидааст.

Дар ин гузориши солонаи СААД таъкид шудааст, ки амалиёти мубориза бар қочоқи маводи мухаддир дар ду марҳила гузаронида шудааст.

Тибқи иттилои ин гузориш, дар марҳилаи аввали амалиёт се озмоишгоҳи зеризаминии коркарди маводи мухаддир аз байн бурда шуда, 660 сомонаи интернетии вобаста ба қочоқи маводи мухаддир шиносоӣ шудааст. Инчунин, дар ин марҳила 140 силоҳи гарм ва 7 ҳазору 885 аслиҳаи мухталиф кашф ва мусодира шудааст.

Дар марҳилаи дувуми амалиёт низ 13 озмоишгоҳи зеризаминӣ аз байн бурда шуда, 1 ҳазору 255 ҷинояти вобаста ба қочоқи маводи мухаддир шиносоӣ шудааст.

Ёдовар мешавем, ки аъзои Созмони Аҳдномаи амнияти Дастаҷамъӣ кишварҳои Федератсияи Русия, Тоҷикистон, Қазоқистон, Қирғизистон ва Арманистон мебошанд.

Гузориши мусодира ва кашфи ҳаҷми бузурги маводи мухаддир дар ҳоле нашр мегардад, ки ҳафтаи гузашта дафтари мубориза бар зидди гардиши маводи мухаддири Созмони ҳамкориҳои Шанхай дар Тоҷикистон кушода шуд.

Dialog.tj