Вазири корҳои хориҷии тозатаъйини Иёлоти Муттаҳиди Амрико ба гурӯҳи террористии Толибон ҳушдор дод, ки кишвараш эҳтимол дорад, ҷоизаи бузургтар аз он чӣ барои дастгирии Бен Лоден гузошта буд, барои онҳо таъйин кунад.

Рубио Марко, вазири корҳои хориҷии Иёлоти Муттаҳидаи Амрико дар шабакаи иҷтимоии “X” бо ишора ба гаравгонгирии шаҳрвандони амрикоӣ навишт, ки тоза хабар ёфтам, теъдоди бештаре аз гаравгонҳои амрикоиро Толибон дар ихтиёр доранд.

“Бояд фавран ҷоизаи бузургтаре барои сарварони аршади онҳо таъйин кунем. Шояд, ҳатто бузургтар аз ҷоизае, ки барои Бен Лоден таъйин шуда буд”- афзуд Вазири корҳои хориҷии ИМА.

Рубио Марко иттилооти бештареро дар робита ба гаравгонгирии амрикоиҳое, ки дар зиндонҳои Толибон ба сар мебаранд, ифшо накард.

Дар ҳафтаи гузашта мақомоти Иёлоти Муттаҳидаи Амрико барои озодии ду гаравгони амрикоӣ аз зиндони Толибон иқдом карда буданд.

Гурӯҳи Толибон аз соли 2021 ба ин сӯй назорати ҳукумат дар Афғонистонро дар ихтиёр доранд ва  то ҳанӯз аз ҷониби ҷомеаи байналмилалӣ ба расмият шинохта нашудаанд.

Доналд Трамп мавқеи тундтар нисбат ба гурӯҳи террористии Толибон интихоб кардааст. Ӯ чанде қабл гуфт, ки кумакҳои молии Амрикоро барои Афғонистон қатъ мекунад. Ҳамчунин, аз гурӯҳи Толибон хост аслиҳаҳои Амрикоро, ки дар Афғонистон ҷо мондаанд, баргардонанд.

Гурӯҳи мансабдорони амниятии ҳукумати Доналд Трамп нисбат ба ҳузури террористон ва ба макони амни гурӯҳҳои террористӣ табдил шудани Афғонистон нигронанд. Дар муоҳидаи Доҳа, ки Толибон бо Иёлоти Муттаҳидаи Амрико дар давраи президентии Доналд Трамп имзо карда буданд, уҳдадор шуданд, ки дигар Афғонистон ба пойгоҳи террористони хориҷӣ табдил нахоҳад шуд.

Dialog.tj