Як вазири гурӯҳи террористии Толибон дар дидор бо сафир ва ҳайати русӣ пешниҳод кардааст, ки Федератсияи Русия аз Афғонистон коргар қабул кунад.

Абдуманнон Умарӣ, вазири кор ва умури иҷтимоии Толибон бо сафири Русия дар Кобул Димитрий Жирнов ва Николай Сожнов, мушовири иқтисодӣ ва тиҷоратии ҳукумати Русия масоили равобити дуҷонибаи Афғонистону Русияро мавриди баррасӣ қарор доданд.

Дар ин мулоқот Абдуманнон Умарӣ ба сафир ва намояндаи иқтисодии ҳукумати Русия пешниҳод карда, ки Русия аз Афғонистон коргар қабул кунад. Ӯ афзуда, ки як гурӯҳи техникӣ барои фиристодани коргарони афғон ба Русия ташкил шавад. Абдуманнон Умарӣ, ҳамчунон, хостори фароҳам шудани бозори муносиб барои маҳсулоти кишоварзии Афғонистон дар Русия шудааст.

“Толибон хоҳони равобити нек ва бо эҳтироми дуҷониба бо кишварҳои минтақа ва ҷаҳон аст. Хушбахтона, ин сиёсат боиси таҳкими робитаҳои сиёсӣ ва барқарор шудани робитаҳои иқтисодиву тиҷоратӣ бо бархе кишварҳо шудааст”- гуфта Абдуманнон Умарӣ дар мулоқот бо ҳайати русӣ.

Дар ин дидор сафири Русия Дмитрий Жирнов аз пешрафти назаррас дар робитаҳои тиҷоратӣ миёни ду кишвар ёдовар шуда ва таъкид кардааст, ки кишвараш ба рушди бештари робитаҳои иқтисодӣ бо Афғонистон ҳавасманд мебошад.

Dialog.tj