Вазири корҳои хориҷии Ҷумҳурии Исломии Эрон рӯзҳои наздик ба Афғонистон сафар карда, бо мақомоти олии гурӯҳи террористии Толибон мулоқот хоҳад кард. Ин нахустин сафари кории вазири хориҷии Эрон пас аз бозгашти Толибон ба қудрат аст.

Сафорати Ҷумҳурии Исломии Эрон дар Кобул хабар дод, ки Сайид Аббос Ироқчӣ, вазири корҳои хориҷии Эрон бо ҳайате аз масъулони Эрон барои анҷоми музокирот ва гуфтугӯи сатҳи олӣ вориди Кобул хоҳад шуд. Дар иттилоъе, ки сафорати Эрон дар Кобул нашр кард, аз ҷузъиёти сафари Ироқчӣ чизе гуфта намешавад.

Вале хабаргузории “Мизон” –и Эрон хабар додааст, ки ин сафар якрӯза хоҳад буд ва Сайид Аббос Ироқчӣ бо мақомоти олии Толибон дар заминаи “мавзуъҳои муҳимми дуҷониба ва минтақавӣ гуфтугӯ хоҳад кард”.

Тибқи иттилоъ, дар ин сафар як қатор масъалаҳо, аз ҷумла масоили иқтисодиву тиҷоратӣ, мавзуъҳои нигаронӣ миёни ду ҷониб мавриди баҳс ва баррасӣ қарор хоҳад гирифт. Сайид Аббос Ироқчиро дар ин сафар намояндагон аз вазоратҳои мухталифи Эрон ва ҳайатҳои иқтисодиву тиҷоратӣ ҳамроҳӣ хоҳанд кард.

Ҷумҳурии Исломии Эрон як қатор масоили баҳсбарангезе бо гурӯҳи террористии Толибон дорад. Муноқишаҳои марзӣ ва баҳси ҳақобаи Эрон аз рудхонаи Ҳирманди Афғонистон аз ҷумлаи мавзуҳои баҳсангези дуҷониб мебошанд. Ҳанӯз Эрон ва Толибон ба сари масъалаи ҳақобаи Эрон аз рудхонаи Ҳирманд ба созиш нарасидаанд.

Dialog.tj