Вазири хориҷии Федератсияи Русия дар Шурои амнияти ин кишвар бо ишора ба сиёсати қаблии президенти собиқи Амрико Ҷо Байден гуфт, ки амрикоиҳо дар фикри боз гардонидани таҷҳизоти низомии баҷомондаи худ ва эҷоди зерсохтҳои низомӣ дар Афғонистонанд.

Сергей Лавров, ки рӯзи душанбе дар Шурои амнияти Федератсияи Русия суханронӣ мекард, гуфт амрикоиҳо мехоҳанд, бо истифода аз ҳамсояҳои Афғонистон ба ин ҳадафи худ бирасанд. Вазири хориҷии Русия гуфт, ки ҳарфҳои ӯ ба сиёсати Ҷо Байден дахл дорад.

“Мо ҳамчунон Афғонистонро фаромӯш нахоҳем кард. Ҷое, ки амрикоиҳо низ талош доранд, то ҳадде ҳузури худро дубора барқарор кунанд. Ва аз кишварҳои ҳамсоя барои ин ҳадаф истифода мекунанд”- гуфт Сергей Лавров.

Вазири корҳои хориҷии Федератсияи Русия бо таваҷҷуҳ ба ин ки Иёлоти Муттаҳидаи Амрико талош дорад, равобити худ бо Афғонистонро дар сатҳе нигоҳ дорад, афзуд: “ Амрикоиҳо бо истифода аз кишварҳои ҳамсоя талош мекунанд, то ҳадде ҳузури худро бозгардонанд ва ба фикри эҷоди таъсисоти низомӣ дар Афғонистон ҳастанд”.

Дар нишасти Шурои амнияти Федератсияи Русия Сергей Лавров ба вазъият ва фоҷеаи Ховари Миёна низ ишора кард ва афзуд: “Ба ғайр аз худи минтақаи Ғаза, мушкили Фаластин ба ҳеч ваҷҳ фаромӯш намешавад. Мо ба ёд дорем, ки чӣ гуна Доналд Трамп дар аввалин омадани худ аз калимаҳое ёд кард, ки асосан бо лоиҳаи сулҳи арабӣ тафовут дошт ва шомили одисозии робитаҳои миёни Исроил ва Аъроб аст”.

Dialog.tj