Як хабарнигори афғонистонӣ, ки шаҳрвандии Фаронсаро дорад, пас аз озодӣ аз зиндони Толибон аз шеваи боздошт ва шиканҷааш нақл кардааст.

Муртазо Беҳбудӣ, рӯзноманигори афғонистонӣ-фаронсавӣ дар суҳбат бо “Телевизиони 2”-и Фаронса таъкид кардааст, ки дар зиндонҳои Толибон навъҳои мухталифи шиканҷа вуҷуд дорад ва бархе маҳбусон ба шиканҷа тоб наоварда худкӯшӣ мекунанд.

Муртазо Беҳбудӣ, ки барои омода намудани гузориш оид ба вазъияти Афғонистон вориди ин кишвар шуда буд, аз сӯйи ниҳоди амниятии Толибон боздошт шуд. Ӯ мегӯяд, маъмурони Толибон ҳангоме, ки дар рӯ ба рӯи Донишгоҳи Толибон гузориш таҳия мекард, ӯро боздошт намуда, ба зиндон бурданд.

“Дастҳо ва пойҳоямро банд заданд ва суратамро пӯшониданд. Сипас, маро ба зеризамини як сохтмон бурданд ва ҳафт рӯз паёпай ба муддати ним соат шалоқ заданд” - таъкид кардааст Муртазо Беҳбудӣ.

Муртазо Беҳбудӣ мегӯяд, ки дар зиндон Толибон дандонҳояшро кандаанд, бо электрошокер задаанд ва барои озору азият ба ҷисмаш сӯзандору газаронидаанд. Вай таъкид кардааст, ки дар се моҳи аввали зиндон ҳар рӯз шиканҷа шудааст. Рӯзноманигори афғонистонӣ-фаронсавӣ афзудааст, ки дар ҳафт моҳи зиндон осмонро надида ва дар фазои баста зиндонӣ будааст.

“Дар се моҳи аввал ҳар рӯз шиканҷа шудам. Дандонҳоямро канданд, бо электрошокер заданд ва сӯзандоруи иҷборӣ карданд. Ман аслан тасаввур намекардам, ки зинда бимонам”- гуфтааст Муртазо Беҳбудӣ.

Муртазо Беҳбудӣ бо мусоидати Фаронса аз зиндони Толибон озод шуд ва ҳоло дар Фаронса зиндагӣ мекунад. Ӯ мегӯяд, ки шиканҷа ва озору азияти Толибон ӯро раҳо накардааст. Зикр мекунад, ки ҳар ҳафта бо равоншинос мулоқот мекунад. Осори шиканҷаи Толибон мисли хоб ӯро озор медиҳад.

Фаъолони ҳуқуқи башари Афғонистон мегӯянд, ки Толибон дар зиндонҳои худ аз 11 навъи шиканҷаи сахт кор мегиранд, ки ғайриинсонӣ ва хилофи қонунҳои байналмилалӣ аст. Онҳо аз ҷомеаи ҷаҳонӣ мехоҳанд, ки Толибонро водор кунанд, даст аз шиканҷа дар зиндонҳо бар доранд.

Dialog.tj