Никол Пашинян, сарвазири Арманистон рӯзи 4-уми декабр зимни суханронӣ дар палумони ин кишвар гуфт, ки Арманистон худро берун аз Созмони аҳдномаи амнияти Дастаҷамъӣ (СААД) медонад ва бозгашти кишварашро ба ин Созмон ғайриимкон хонд. Дар ин хусус расонаҳои ин кишвар хабар додаанд.

“Дар мавриди санадҳое, ки дар нишасти СААД дар Қазоқистон моҳи ноябр қабул шуд, мо гуфтем, ки иштироки худро дар ин Созмон боз доштем. Яъне, мо дар таҳия ва қабули санадҳо ширкат намекунем. Мо ба ҳама гуна пешниҳодҳо вето намегузорем. Воқеан, мо аллакай аз СААД хориҷ шудем” – таъкид кардааст сарвазири Арманистон.

Пашинян ҳамчунин, афзуда, ки бовар дорад, кишвараш дар ин масъала аз нуқтаи бозгашт гузашта аст.

Қобили зикр аст, президенти Федератсияи Русия дар нишасти Остона таъкид кард, ки Арманистон метавонад ба кори доимии Созмон баргардад, зеро аз он хориҷ нашуд, балки “танаффус гирифт”.

Арманистон баъди ҳамлаи Озарбойҷон ба минтақаи Қарабоғи Кӯҳӣ узвияташ дар ин созмонро боздошт. Арманистон аз он норозӣ буд, ки СААД натавониста, ки дар баробари ҳамлаи Озарбойҷон ба Арманистон коре анҷом диҳад.

Dialog.tj