Як гурӯҳи намояндагони қирғизҳо дар Бадахшони Афғонистон гуфтаанд, ки набудани имконоти зиндагӣ ва боҷгириву озору азияти Толибон онҳоро маҷбур хоҳад кард, ки ба шакли гурӯҳӣ хоки Афғонистонро тарк кунанд. Онҳо гуфтаанд, ки боҷгирии Толибон зери номи “ушр” ва “закот” онҳоро ба мушкили зиндагӣ дучор кардааст.

Гуфта мешавад, ки дар ин минтақа аз 20 зане, ки таваллуд мекунанд, ба сабаби набудани имконот 9 нафарашон мемиранд. Онҳо гуфтаанд, ки маҳалли маскуние, ки тавассути ҳукумати қаблӣ барояшон сохта шуда буд, аз сӯйи гурӯҳи Толибон мусодира шудааст.

Қирғизҳои сокини Вахони Бадахшон афзудаанд, ки дар тӯйи се соли ахир дар маҳрумият ба сар мебаранд. Онҳо аз вуҷуд надоштани имконоти тандурустӣ ва мушкилоти иқтисодӣ изҳори нигаронӣ кардаанд.

Мулло Одина, намояндаи қирғизҳо, ки барои ҳалли мушкили қирғизҳои Бадахшон ба маркази вилоят омадааст, дар суҳбат бо ВАО чунин мегӯяд: “Мо мардуми қирғиз дар Помир бо мушкилоти зиёд дучор ҳастем. Аз ҷумла набудани табиб, марказҳои саломатӣ ва муҳимтар аз он душвор будани роҳҳои рафтуомад дар зимистон. Ба сабаби хароб будани роҳҳо ҳеч воситаи нақлиёте пайдо намекунем ва ин боис шудааст, ки маргу мири беморони мо зиёд шавад”.

Ӯ хитоб ба гурӯҳи Толибон мегӯяд, ки агар мушкилоташон ҳал нашавад, онҳо аз рӯйи ночорӣ Афғонистонро тарк карда, ба кишварҳои минтақа, бахусус Қирғизистон ҳиҷрат хоҳанд кард.

Dialog.tj