Мақомоти амниятии Федератсия Русия журналист Надежда Кеворковаро барои “таблиғи фаъолияти Толибон” дар ин кишвар боздошт кардаанд. Гуфта мешавад, ки журналисти номбурда моҳи майи соли 2024 боздошт шуда ва суд муҳлати боздошти ӯро дар ин ҳафта тамдид кардааст. Дар ин хусус расонаҳои Русия хабар доданд.

ВАО-и давлатии Федератсияи Русия хабар дод, ки боздошти ин журналист пас аз он сурат гирифт, ки ӯ дар соли 2021 дар саҳифаи телеграмаш “фаъолияти Толибонро тавҷеҳ” кард. Иттиҳоми дигаре, ки нисбат ба ин журналист матраҳ шудааст, гузориши ӯ дар робита ба қатли журналист Орхан Камол мебошад.

Тибқи иттилои “РИА Новости” журналист Надежда Кеворкова то панҷуми январи соли 2024 дар боздоштгоҳ боқӣ мемонад ва то замони поёни муҳлати боздошташ таҳқиқоти ҷиноӣ анҷом хоҳад шуд.

Ин журналисти рус бо як қатор рӯзномаҳои машҳури Русия, аз ҷумла “Новая газета” ва “Независимия газета” ҳамкорӣ доштааст. Вай ба ҳайси хабарнигор дар Ироқ, Сурия, Эрон, Лубнон ва Ғаза фаъолият кардааст. Худи журналист иттиҳомҳои воридшударо барояш рад кардааст.

Қобили зикр аст, ки гурӯҳи террористии Толибон дар Федаратсияи Русия дар қатори гурӯҳҳои террористӣ дохил карда шудааст ва аз ин рӯ, ҳаргуна ҳимоят ва таблиғи он ҷурм маҳсуб мешавад.

Dialog.tj