Муовини вазири корҳои хориҷии Федератсияи Русия гуфтааст, ки тасмимгирии дубора оиди ба расмият шинохтани ҳукумати террористии Толибон дар Афғонистон зуд аст ва бояд дар ин замина ба тадриҷ ва гом ба гом амал кард.

Андрей Руденко, муовини Вазири корҳои хориҷии Федератсияи Русия ба хабаргузории ТАСС гуфтааст, ки Русия дар раванди хориҷ намудани номи Толибон аз феҳристи гурӯҳҳои террористӣ монеа эҷод намекунад, аммо дар мавзуи ба расмият шинохтани гурӯҳи зикршуда ҳанӯз зуд аст, ки суҳбат шавад: “Комил намудани равандҳои қонунӣ барои тағйири вазъияти Толибон ва хуруҷ аз феҳристи созмонҳои террористӣ ба робитаҳои Русия ва  Афғонистон дар ҳавзаҳои мухталиф, бахусус иқтисодӣ, натиҷаи мусбате хоҳад дод” – таъкид кардааст Андрей Рудинко.

Ӯ бо зикри ин ки Русия барои барқарор намудани робита бо мақомоти феълии Афғонистон қадамҳои устувор хоҳад гузошт афзуда, ки Маскав бо гурӯҳи зикршуда “мавзуъҳои мавриди алоқаи дуҷониба “ дорад.

Бояд зикр намуд, ки Русия бори нахуст соли 2003 гурӯҳи Толибонро барои ҳамкорӣ бо ҷудоиталабони чечену доғистонӣ ба феҳристи гурӯҳҳои террористӣ дохил кард. Пас аз ба қудрат расидани гурӯҳи Толибон равобити дипломатиро эҳё намуд. Вале мақомоти блоки низомии ин кишвар ҳамеша бо чашми нигаронӣ ба Афғонистон менигаранд ва ин кишварро манбаи таҳдидҳои амниятӣ маънидод мекунанд. Дар тозатарин иқдомҳо дабири кулли Иттиҳоди Давлатҳои Мустақил пешниҳод кард, ки дар атрофи марзи Афғонистон бо Осиёи Миёна “камарбанди амниятӣ “ сохта шавад.

Dialog.tj