Хабаргузории “Франс-пресс” хабар додааст, ки гурӯҳи террористии Толибон садҳо номгӯй китобро ба хотири доштани “муҳтавои ғайрисломӣ” аз бозор ва китобхонаҳои Афғонистон ҷамъоварӣ кардаанд.

Тибқи иттилои хабаргузорӣ Вазорати иттилоот ва фарҳанги гурӯҳи Толибон ба хотири ин кор комиссия ташкил намудааст, ки кори он ташхис ва кашфи китобҳоест, ки муҳтавои ғайрисломӣ доранд.

Масъули як чопхона ба хабаргузории зикршуда гуфтааст, ки “Сензураи зиёде вуҷуд дорад. Кор бисёр душвор шудааст ва тарс ҳама ҷоро фаро гирифтааст.”

Толибон панҷ номгӯй китоби мамнуъшуда аз сӯйи ин гурӯҳро ба хабарнигори “Франс-пресс” эълон кардаанд. “Исо писари инсон”-и Ҷуброн Халил, “Гург ва гусфандон худоёни шарқӣ” –и Исмоил Кодора, “Афғонистон ва минтақа: чашмандози ғарби Осиё” – и Мирвайси Балхӣ аз ҷумлаи китобҳои манънамудаи гурӯҳи Толибонанд. Гурӯҳи террористии Толибон гуфтаанд, ки дар ин китобҳо ибораҳои куфромез ва таҳқири ислом ҷой дорад.

Муҳаммадсиддиқ Ходимӣ, як мақомдори гурӯҳи террористии Толибон дар ин бора чунин гуфтааст: “Мо китобҳои ҳеч кишвар ё шахси хосеро мамнуъ накардаем, аммо китобҳоеро, ки бо дин, шаръ ё низоми Толибон мухолифат доранд ё акси мавҷудоти зинда доранд, ҷамъоварӣ мекунем.”

Расонаҳо дар ин бора навиштаанд, ки баррасии китоб ва ҷамъоварии он аз сӯйи гурӯҳи террористии Толибон башиддат идома дорад.

Dialog.tj