Вазири корҳои хориҷии Эрон Аббос Ироқчӣ дар Қувайт гуфт, ки Эрон хоҳони ҷанг нест, вале ба ҷанг омодагӣ дорад. Ироқчӣ таъкид кард, ки тамоми фаъолияти пойгоҳҳои низомии Амрикоро дар минтақа назорат мекунанд ва дар сурати ҳамла посухи муносиб хоҳанд дод.

Аббос Ироқчӣ барои гуфтугӯҳои дипломатӣ дар Қувайт қарор дорад ва дар мулоқот бо масъулини ин кишвар гуфтааст, “кишварҳои минтақа ин тавоноиро доранд, ки аз тариқи талошҳои муштарак пеши фоҷеа дар минтақаро бигиранд”.

Аббос Ироқчӣ дар пайи таҳдиди Исроил барои ҳамла ба Эрон талошҳои дипломатиро дар Ховари Миёна анҷом медиҳад. Вай қабл аз сафар ба Қувайт ба 10 кишвар дар Ховари Миёна сафар намуда, оид ба паёмадҳои густариши ҷанг дар минтақа ҳушдор дод.

“Дар гуфтугӯҳое, ки ман дар кишварҳои минтақа ва дар Қувайт ба унвони ёздаҳумин мақсади сафарҳои ахир дошта ва дорам, фикр мекунам, тафоҳум ва дарки муштараке барои пешгирӣ аз ҷанг вуҷуд дорад” – таъкид мекунад вазири корҳои хориҷаи Эрон.

Аббос Ироқчӣ таъкид кард, ки ҳамлаи мушакии Эрон ба Исроил ҳаракати дифоъӣ ва посух ба ҳамлаҳои Исроил буд.

Dialog.TJ