Расонаҳои наздик ба ҳукумати Қатар навиштаанд, ки генерали эронӣ Исмоил Қоонӣ ба гумони рахнаи иттилоотӣ дар сатҳҳои Сипоҳи қудс аз сӯйи маъмурони иттилоотии Эрон мавриди бозпурсӣ қарор гирифтааст. “Скай нюс”- расонаи ғарбӣ низ аз қавли 10 манбаи худ аз Эрон гузориш дода, ки Исмоил Қоонӣ мавриди бозҷӯйии шадид қарор гирифта, дучори ҳамлаи қалбӣ шудааст. Ҳамчунин, раиси дафтари Исмоил Қоонӣ ва ҳамроҳонаш ба гумони ҷосусӣ ба нафъи Исроил боздошт шудаанд.

Тибқи иттилоъ, Исмоил Қоонӣ пас аз он ки Ҳасан Насруллоҳ мавриди ҳамлаи ҳавоии Исроил қарор гирифт, боздошт шуд. Мақомоти Ҳизбуллоҳ гуфтаанд, ки макони ҳузури Ҳасан Насруллоҳ аз тарафи низомиёни эронӣ ифшо шуда, боиси марги раҳбари Ҳизбуллоҳ гардидааст. Як манбаи Ҳизбуллоҳ ба расонаи қатарӣ чунин гуфтааст: “Ин нуфуз сад дар сад марбут ба тарафҳои эронӣ буд ва дар ин маврид ҳич шаке вуҷуд надорад”.

Беш аз як ҳафта ғайбати Исмоил Қоонӣ гумонзаниҳои зиёдеро ба вуҷуд овардааст. Дар ибтидо эҳтимоли захмӣ ва ё кушта шудани он матраҳ буд, вале тайи чанд рӯзи ахир масъалаи боздошт ва таҳти бозҷӯйӣ қарор гирифтани ӯ матраҳ шудааст.

Хабаргузории “Тасним”, ки наздик ба Сипоҳи посдорон аст, хабарҳои мавриди боздошт ва бозҷӯйӣ қарор гирифтани Исмоил Қоониро рад кардааст. Тасним расонаҳои Рейтерс ва Ню-Йорк таймсро ба дурӯғгӯйӣ мутаҳам карда, навиштааст “Рейтерз ва Ню- Йорк таймс ин рӯзҳо ахбори дурӯғашонро ба нақл аз “ду ё се манбаи муталеъ” менависанд.

Иброҳим Ҷобирӣ чанде қабл гуфта буд, ки Исмоил Қоонӣ дар саломати комил аст ва рӯзҳои наздик аз тарафи Оятуллоҳ Хоманаӣ нишони “Фатҳ” –ро дарёфт хоҳад кард.

Dialog.TJ