Доналд Трамп, раиси ҷумҳури ИМА бори дигар аз ҳамтои украинии худ Владимир Зеленский интиқод карда, иддао намуд, ки ӯ дар амал барои расидан ба созиш бо Русия иродаи воқеӣ надорад. Трамп ҳамчунин, ҳамлаҳои Украина ба корхонаҳои коркарди нафти Русияро ба болоравии нархи ҷаҳонии нафт рабт дод.

Тавре хабаргузориҳои Амрико менависанд, Трамп ин изҳоротро дар суҳбат бо шабакаи “Нюзмекс” (Newsmax) баён кардааст. Ба гуфтаи ӯ, Зеленский бо вуҷуди изҳори хоҳиши расидан ба созиш, дар амал барои татбиқи он талош намекунад.

Раиси ҷумҳури Амрико ҳамчунин, хусумати шахсӣ миёни Зеленский ва раиси ҷумҳури Русия Владимир Путинро яке аз монеаҳои ҷиддӣ дар роҳи расидан ба созиш донист. Ӯ таъкид кард, ки ҷанг бояд ҳарчи зудтар поён ёбад ва ба бовари ӯ, ҳар ду ҷониб хостори анҷоми он ҳастанд.

Трамп ҳамчунин, изҳор дошт, ки Украина дар шароити ҷангӣ ба баргузории интихоботи нав ниёз дорад. Ӯ дар рӯзҳои охир зарурати тағйири раиси ҷумҳури Украинаро низ матраҳ кардааст.

Танишҳои миёни Трамп ва Зеленский моҳҳои охир идома доранд. Яке аз баҳсҳои пурҷанҷоли онҳо 28-уми феврали соли 2025 дар Кохи Сафед, дар ҳузури дурбинҳои расонаҳо рух дода буд. Он замон Трамп ва муовини ӯ Ҷей Ди Вэнс борҳо суханони Зеленскийро қатъ карда, ӯро ба қадр накардани ҳимояти ИМА ва омода набудан ба созиш бо Русия муттаҳам намуданд.

Баҳси ошкоро боиси пеш аз муҳлат анҷом ёфтани мулоқот шуд. Созишномае, ки қарор буд дар бораи захираҳои маъдани Украина ба имзо расад, низ ба натиҷа нарасид.

Дар ҳамин ҳол, Киев бар идомаи ҳамлаҳо ба зерсохторҳои энергетикии Русия таъкид мекунад. Трамп ин ҳамлаҳоро ба болоравии нархи сӯзишворӣ рабт додааст.

Dialog.tj