Вазорати тандурустии Русия эълом кардааст, ки пас аз марги яке аз кормандони Институти тадқиқотии зидди вабои Иркутск дар Сибир ва Шарқи Дур - “Роспотребнадзор”, хатари вуқуи ҳамагирӣ дар ин минтақа вуҷуд надорад.

Расонаҳои Русия рӯзи панҷшанбе, 8-уми октябр гузориш додаанд, ки ин корманди озмоишгоҳ, ки 28 сол дошт, ҷумъаи гузашта бар асари зотулрия бо сабаби номуайян ҷон бохтааст.

Бар асоси гузориш, дар пайи ин ҳодиса, ки нигарониҳои байналмилалӣ, аз ҷумла нигаронии Доналд Трамп, раиси ҷумҳури Амрикоро барангехт, дар ибтидо тахминан 200 нафар карантина шуданд.

Ин дар ҳолест, ки Созмони ҷаҳонии тандурустӣ аз Маскав хостааст маълумоти бештаре дар бораи сабаби марги ин фард ироа кунад.

Тедрос Адханом Гебрейесус, мудири кулли Созмони ҷаҳонии тандурустӣ, рӯзи чаҳоршанбе изҳор дошт, ки ин созмон барои дарки дақиқи ин ҳолат, ба маълумоти бештаре аз сӯйи Русия ниёз дорад.

Бо ин ҳол, Гебрейесус дар ибтидо эълом карда буд, ки бар асоси маълумоти мавҷуд, хатари ин ҳолатро дар Русия барои ҳамаи мардум поин арзёбӣ мекунад: аммо рӯзи чаҳоршанбе дар як конфронси матбуотӣ гуфтааст, ки ба далели нокофӣ будани маълумоти ироашуда аз сӯйи мақомоти Русия, имкони анҷоми арзёбии комилтари хатар вуҷуд надорад.

Dialog.tj