Ҷумҳурии Тоҷикистон ва Қирғизистон метавонанд бо истифода аз неруи барқи обӣ дар рушди марказҳои бузурги ҳисоббарорӣ барои ҳуши маснуъӣ ҷойгоҳи нав пайдо намоянд.

Агентии байналмилалии “Moody’s” гуфтааст, норасоии мавсимии неруи барқ ва фарсуда будани шабакаҳои энергетикӣ метавонад ба ин нақшаҳо монеа эҷод кунад.

Бар асоси гузориши ин агентӣ Осиёи Марказӣ метавонад дар солҳои оянда на фақат як долони муҳимми тиҷоратӣ, балки як масири калидии интиқоли маълумоти рақамӣ низ шавад. Ин агентӣ мегӯяд, ташаббуси “Роҳи рақамии Абрешим” ба густариши интернет, кабелҳои нахи оптикӣ ва марказҳои коркарди иттилоот дар минтақа мусоидат хоҳад кард.

Тибқи иттилои ин агентӣ яке аз лоиҳаҳои асосӣ кашидани кабели зериобии нахи оптикӣ миёни Озарбойҷон ва Қазоқистон мебошад. Кабели дигар ба воситаи Баҳри Сиёҳ метавонад Қафқози Ҷанубиро ба шакли мустақимтар ба Аврупо пайванд диҳад.

Гуфта мешавад, ки дар ин рақобати технологӣ Ҷумҳурии Қазоқистон ва Ӯзбекистон аз ҳоло қадамҳои ҷиддӣ гузоштаанд. Ҷумҳурии Қазоқистон барои бунёди марказҳои коркарди маълумот ва рушди суперкомпютери миллӣ сармоягузорӣ мекунад. Ин кишвар барои ҷалби сармоя ба ин соҳа ва истифодаи энергияи таҷдидшаванда талош дорад.

Агентии “Moody’s” мегӯяд, ки Ҷумҳурии Тоҷикистон ва Қирғизистон низ дар ин соҳа имконият доранд. Ба гуфтаи ин агентӣ, неруи барқи обӣ метавонад ба ин ду кишвар барои рушди иқтидорҳои ҳисоббарорӣ замина фароҳам кунад.

Агентии “Moody’s” мегӯяд, рушди марказҳои коркарди иттилоот ва инфрасохтори рақамӣ метавонад дар оянда ба густариши хадамоти абрӣ, ҳуши маснуъӣ ва дигар хизматрасониҳои технологӣ дар тамоми минтақа мусоидат кунад.

Dialog.tj