Рӯзи 16-уми сентябр дар шаҳри Сеул, пойтахти Кореяи Ҷанубӣ нахустин мулоқоти сарони кишварҳои Осиёи Марказӣ бо Президенти Кореяи Ҷанубӣ дар доираи саммити Осиёи Марказӣ + Кореяи Ҷанубӣ баргузор мешавад.

Президентҳои Осиёи Марказӣ дар саммити зикршуда ширкат намуда, доираи ҳамкориҳои дуҷониба ва бисёрҷониба бо Кореяи Ҷанубиро мавриди баррасӣ қарор хоҳанд дод.

Тибқи иттилои расонаҳои кореягӣ, яке аз масъалаҳои муҳимми саммит пайдо кардани роҳҳои нави таъмини захираҳои стратегӣ мебошад. Кореяи Ҷанубӣ нақша дорад, ки  дар бахши захираҳои табиӣ ва энергетикии Осиёи Марказӣ сармоягузорӣ кунад.

Таъкид мешавад, ки музокироти сарони кишварҳо фақат бо захираҳои табиӣ ва энергетикӣ маҳдуд намешавад. Сарони кишварҳо масъалаи истифодаи технологияҳои муосири истеҳсоли Корея дар бахшҳои муҳимро мавриди баррасӣ қарор медиҳанд.

“Сарони кишварҳо ҳамчунин, дар хусуси ҳуши маснуъӣ, илму технология ва иқтисоди рақамӣ суҳбат мекунанд. Сеул умедвор аст, ки ин ҳамкориҳо барои ширкатҳои кореягӣ имкони бештар фароҳам меоранд, то ба бозорҳои Осиёи Марказӣ ворид шаванд” - менависад “Aju Press”.

Мавзуи тағйирёбии иқлим, идоракунии захираҳои об, муқовимат ба офатҳои табиӣ ва ҷинояткории фаромиллӣ низ яке аз масъалаҳои муҳимми рӯзномаи нишаст хоҳанд буд.

Ли Чже Мён, президенти Кореяи Ҷанубӣ дар ҳошияи нишаст бо сарони кишварҳои Осиёи Марказӣ мулоқоти дуҷониба анҷом дода, масоили вобаста ба ҳамкориҳои дуҷонибаро мавриди баррасӣ қарор хоҳанд дод. Мулоқоти нахустини президенти Кореяи Ҷанубӣ рӯзи душанбе, бо Президенти Ӯзбекистон Шавкат Мирзиёев сурат хоҳад гирифт.

“Интизор меравад, ки тақрибан 500 намояндаи ҳукумат ва бахши хусусӣ дар форуми тиҷоратии ҳамзамон бо саммит ширкат намуда, имкониятҳои сармоягузорӣ ва роҳҳои ташкили робитаҳои нави тиҷоратиро баррасӣ кунанд” - хабар медиҳанд расонаҳои кореягӣ.

Ҳамчунин, дар меҳвари музокироти сарони Осиёи Марказӣ ва Кореяи Ҷанубӣ масъалаҳои иқтисодӣ қарор хоҳад гирифт. Ҷонибҳо ният доранд роҳҳои афзоиши тиҷорат, ҷалби сармоя, густариши ҳамкориҳо дар соҳаи энергетика, истифодаи захираҳои маъданро баррасӣ намоянд.

Президенти Кореяи Ҷанубӣ таъкид намуд, ки нишасти сарони Сеул метавонад муносибатҳои Кореяи Ҷанубӣ ва кишварҳои Осиёи Марказиро ба марҳилаи нави ҳамкорҳои бисёрҷониба ворид кунад.

Dialog.tj