Вазири дифои Ҳинд Раҷнатх Сингх гуфтааст, ки ҳеч гуна музокирот бо Покистон дар дастури кори Деҳлӣ қарор надорад ва агар гуфтугӯе миёни ду кишвар сурат бигирад, он танҳо дар мавриди масъалаи Кашмир хоҳад буд.

Ба гузориши рӯзномаи “Индиа Экспресс” (India Express), Раҷнатх Сингх дар маросими ёдбуди ҷанги Каргил бо ҳушдор ба Покистон дар бораи ҳар гуна иқдоми танишзо гуфтааст, ки Ҳинд дар сурати ҳар иқдоми Покистон бо ҳамон равиши стратегии гузашта посух хоҳад дод.

Ӯ афзудааст: “Мехоҳам паёми рӯшане бирасонам. Ҳар иқдоме, ки бо ҳадафи заъиф кардани ҳокимияти Ҳинд анҷом шавад, бо посухе монанди он чӣ дар амалиёти “Синдур” рух дод, рӯбарӯ хоҳад шуд”.

Сингх ҳамчунин, Покистонро ба ҳимоят аз терроризм муттаҳам карда ва иддао кардааст, ки дар ҳоле ки Ҳинд ба тавсеа ва пешрафти фанноварӣ тамаркуз дорад, Покистон ҳамчунон ба ҳимоят аз терроризм, ифротгароӣ ва нуфуз идома медиҳад.

Вазири дифои Ҳинд гуфтааст, ки Деҳлӣ дигар миёни омилони ҳамлаҳои террористӣ ва сохторҳои ҳомии онҳо тафовуте қоил нахоҳад шуд.

Ӯ ҳамчунин, иддао кардааст: “Покистон терроризмро ба бахше аз сиёсати худ табдил додааст ва артиши ин кишвар аз гурӯҳҳои террористӣ ҳимоят мекунад ва бо онҳо ҳамкорӣ дорад”. Сингх гуфтааст, ки Ҳинд дар ҷараёни амалиёти “Синдур” ин равишро ба рӯшанӣ эълом кардааст.

Дар ҳамин ҳол, расонаҳои покистонӣ ба нақл аз мақомоти ин кишвар гузориш додаанд, ки Исломобод ҳамеша хостори гуфтугӯ бо Ҳинд барои ҳалли ихтилофот, аз ҷумла масъалаи Кашмир, будааст. Покистон ҳамзамон иттиҳомҳои Деҳлӣ дар бораи ҳимоят аз гурӯҳҳои террористиро рад карда ва мутақобилан Ҳиндро ба ҳимоят аз он чӣ “терроризми фаромарзӣ” меномад, муттаҳам кардааст.

Ҳинд ва Покистон аз замони истиқлол аз Бритония дар соли 1947 бар сари минтақаи Кашмир ихтилоф доранд ва то кунун чандин бор бар сари ин минтақа вориди ҷанг ва даргириҳои низомӣ шудаанд. Ҳар ду кишвар иддаои соҳибихтиёрӣ бар тамоми Кашмирро доранд, аммо ҳар яке бахше аз ин минтақаро таҳти назорат доранд.

Dialog.tj