Николай Патрушев, ёрдамчии раиси ҷумҳур ва раиси ҳайати дарёнавардии Русия, гуфт, ки Ғарб талош мекунад дастрасии ин кишварро ба роҳҳои байналмилалии дарёнавардӣ масдуд кунад.

Ба гузориши “ТАСС”, Патрушев изҳор кард: “Кишварҳои ғарбӣ дидгоҳи густардатаре доранд: онҳо мехоҳанд моро аз роҳҳои байналмилалии киштиронӣ ҷудо кунанд. Онҳо мехоҳанд баҳри Балтикро бубанданд ва онро ба обҳои дохилии худ табдил диҳанд. Онҳо инро пинҳон намекунанд”.

Патрушев бо баёни ин ки Ғарб ҳамчунин, мехоҳад дастрасӣ ба Баҳри Сиёҳро маҳдуд кунад, хотирнишон кард: “Илова бар ин, онҳо барои Қутби Шимол, пеш аз ҳама дар баҳри Барентс, ки мо дар он ҷо пойгоҳ дорем, барномарезӣ мекунанд. Мо аз ин мавзуъ огоҳ ҳастем ва табиатан бо он мухолифем”.

Ёрдамчии раиси ҷумҳури Русия афзуд: “Мехоҳам бар ин нукта таъкид кунам, ки агар неруи дарёии мо қодир ба таъмини амният набошад, дигар Русияе вуҷуд нахоҳад дошт. Ин ба он маъност, ки мо аз назари иқтисодӣ ноком хоҳем шуд. Ба ҳамин далел мо ба як неруи дарёии қавӣ ниёз дорем”.

Патрушев, ки бо хабарнигори “Вести” мусоҳиба мекард, дар бахши дигари суханонаш гуфт: “Хадамоти амнияти федералии Русия (ФСБ) ва Идораи марказии иктишофии ИМА (CIA), бо мувофиқати раисони ҷумҳури Русия ва Амрико, амалиёти муштаракеро барои аз миён бурдани Усома бин Лодин, раҳбари гурӯҳи террористии Ал-Қоида, омода карданд.”

Вай афзуд, ки Русия аз ҷониби худ ба ин тавофуқ амал кард, аммо Амрико ин корро накард.

Ёрдамчии раиси ҷумҳури Русия гуфт: “Мо медонем, ки ӯ (бин Лодин) омили онҳо буд ва онҳо муддате аз ӯ истифода карданд.”

Dialog.tj