Мадуро аз мардум ва неруҳои амниятии Венесуэло хост, ки аз “ҳар ваҷаб” хоки кишвар дар муқобили ҳар гуна таҳдид ё таҷовузи империалистӣ дифоъ кунанд.

Николас Мадуро, Президенти Венесуэло дар ҷараёни суханронӣ дар раҳпаймоии бузурге, ки ба муносибати 200 -солагии тақдими шамшери ҳадянамудаи мардуми Перу ба Симон Боливар доир шуд, бо либоси низомӣ ва дар ҳузури аъзои ҳукумат ва фармондеҳони неруҳои мусаллаҳи миллӣ гуфт, ки “Ватан аз мо талош ва фидокории бештар талаб мекунад”.

Николас Мадуро бо тааҳҳуд барои “дифоъ аз ҳокимияти миллӣ дар муқобили таҳдидҳои империалистии ростгароёни ифротӣ” дар як суханронии тезу тунд аз донишҷӯён, коргарон ва деҳқонон даъват намуд, ки то бо “масъулият ва ишқ” бархезанд. Ӯ афзуд, ки “шикаст дар ин бурҳаи ҳассос ҷоиз нест”.

“Мо аз муттаҳидонамон, кишвари бародар Куба, Эрони мубориз, Русияи тавоно, Чини сулҳҷӯ сипосгузорем. Онҳо дар баробари таҳримҳо истодагарӣ карданд ва моро танҳо нагузоштанд. Аммо пирӯзии ниҳоӣ ба дасти мардуми Венесуэло аст. Мо интихоботро бурдем, инқилобро ҳифз кардем ва ҳоло вақти он расидааст, ки бо тамоми қувва дифоъ кунем”- таъкид намуд Николас Мадуро.

Шамшери Боливар дар соли 1825 аз сӯи мардуми Перу ба Симон Боливар, роҳбари истиқлоли Амрикои Лотин тақдим шуда буд ва аз он замон то ба имрӯз ҳамчун рамзи озодӣ ва истиқлол дар Венесуэло ва дигар кишварҳои Амрикои Лотин маъруф мебошад.

Dialog.tj