Бар асоси созиши нави мақомоти Қирғизистон ва Ӯзбекистон минбаъд шаҳрвандони ин ду кишвар метавонанд аз кишварҳои якдигар нафақаи суғуртавӣ гиранд. Ин иқдом ба шаҳрвандони ду кишвар имкон медиҳад, ки аз ҳуқуқҳои баробар дар гирифтани нафақаи суғуртавӣ ва давлатӣ бархӯрдор шаванд.

Тибқи иттилои Хадамоти матбуоти фонди иҷтимоии Қирғизистон ин созиш дар мулоқоти коршиносони Фонди иҷтимоии Қирғизистон ва Фонди ғайрибуҷавии нафақаи Ӯзбекистон, ки дар шаҳри Тошканд баргузор шуд, ба даст омадааст. Мақомоти ду кишвар, дар ҷараёни ин мулоқот ба натиҷа расиданд, ки собиқаи меҳнатии шаҳрвандони ду кишвар ба ҳисоб гирифта шавад.

Бар асоси созишнома, агар шаҳрванд аввал дар як кишвар фаъолият дошта, баъдан ба кишвари дигар раваду кори худро идома диҳад, собиқаи меҳнатиаш ҷамъбаст карда мешавад. Ин амр ба пиронсолон имкон медиҳад, ки сари вақт ва бидуни кам шудани маблағ ба нафақа бароянд. Ғайр аз ин, ҷонибҳо ба созиш расиданд, ки маблағи нафақаҳо мустақим ба шаҳрвандон пардохт шавад ва ҳамчунин, барои пардохт ягон маблағи иловагӣ талаб карда нашавад.

Ҳамзамон, агар шаҳрванд муваққатан дар кишвари дигар кор кунад, ӯ дигар маҷбур нахоҳад буд, ки ду карат пардохти суғуртаи нафақавӣ анҷом диҳад. Ин созиш ба он равона шудааст, ки шаҳрвандони ду кишвар барои гирифтани нафақаи давлатӣ ва суғуртавӣ ҳуқуқҳои баробар дошта бошанд.

Dialog.tj