Президенти Ӯзбекистон Шавкат Мирзиёев гуфт, ки сиёсати ҳамкории Ӯзбекистон бо Толибон дуруст аст ва ин кишвар ҳамеша нисбат ба Афғонистон муносибати “воқеӣ ва стратегӣ”-ро амал мекунад. Ӯ гуфт, вақт нишон дод, ки барномаи ҳамкорӣ бо Толибон иқдоми дуруст аст.

Шавкат Мирзиёев дар суҳбат бо хабарнигори телевизиони “Евронюз” дар посух ба суоли ҳамкорӣ бо Толибон чунин изҳор дошт: “Муносибати Ӯзбекистон ва Афғонистон ҳамеша воқеӣ ва стратегӣ буд ва он дурнамои ояндаро фаро мегирад. Мо ҳеч гоҳ аз ҳамсояи худ ҷудо нашудаем ва аз он рӯ нагардонидаем”.

Шавкат Мирзиёев таъкид намуд, ки рушди Афғонистон бидуни ҳамкориҳои кишварҳои ҳамсоя ғайриимкон хоҳад буд. Ӯ афзуд, мутмаин буд, ки ҳукумати пешини Афғонистон қудратро ҳифз карда наметавонад.

Президенти Ӯзбекистон сабаби асосии нокомии ҳукумати пешинро дар ташкил накардани ҳукумати фарогир ва фасоди густурда дар тамоми сатҳҳои давлатӣ арзёб кард.

Шавкат Миризёев бо дифоъ аз сиёсати гурӯҳи террористии Толибон гуфт, ки онҳо тавонистанд вазъиятро мудирият кунанд, захираҳои худро ба рушди зерсохтҳо, аз ҷумла майдонҳои ҳавоӣ, шабакаҳои роҳи оҳан, иншооти обу барқ ва коҳиши кишт ва истеҳсоли маводи мухаддир равона созанд.

Дифои Шавкат Мирзиёев, президенти Ҷумҳурии Ӯзбекистон аз гурӯҳи террористии Толибон дар ҳоле сурат мегирад, ки Амрико, Аврупо ва бархе кишварҳои дигари ҷаҳонӣ аз фаъолияти ин гурӯҳ норозиянд ва барои ояндаи Афғонистон нақшаҳои ҷидиди сиёсӣ ироа мекунанд.

Dialog.tj