Ширкати “ВКонтакте” (VK), ки соҳиби яке аз бузургтарин шабакаҳои иҷтимоӣ ва паёмрасонҳои Русия бо ҳамин ном аст, алайҳи Шурои Иттиҳоди Аврупо ба додгоҳ шикоят бурдааст. Ширкат таҳримҳои ҷоришударо ғайриқонунӣ ва беасос хонда, хостори лағви онҳо шудааст.

Ба гузориши расонаҳои Русия, ширкати VK рӯзи ҷумъа эълон кард, ки рӯзи чоршанбе, 7-уми октябр, шикояти худро расман ба Додгоҳи умумии Иттиҳоди Аврупо, воқеъ дар Люксембург, пешниҳод кардааст. Ин додгоҳ яке аз ниҳодҳои низоми додгоҳии Иттиҳоди Аврупо мебошад.

Чаро Иттиҳоди Аврупо VK-ро таҳрим кард?

Иттиҳоди Аврупо моҳи июли соли 2026 ширкати VK-ро ба феҳристи таҳримҳои зидди Русия ворид карда буд.

Ба гузориши манбаъ, иттиҳомҳои матраҳшуда алайҳи ин ширкат ҳамкорӣ дар назорати давлатии фазои маҷозӣ, масдуд кардани абзорҳои иртиботӣ ва иштирок дар паёмрасони миллии “Макс”-ро дар бар мегиранд.

Ширкати “VK” ин таҳримҳоро ғайриқонунӣ ва беасос медонад ва аз додгоҳ хостааст, ки барои лағви онҳо қарор қабул кунад.

Барномаҳои “VK” ва “Макс” аз Google Play ҳазф шуданд

Пас аз ҷорӣ шудани таҳримҳо, барномаҳои “VK” ва “Макс” аз мағозаи барномаҳои “Google” ҳазф шуданд.

Ин иқдом дастрасии корбарон ба ин барномаҳоро тавассути ин мағозаи нармафзор маҳдуд кард.

Русия мегӯяд, ки таҳримҳои зиёде алайҳи он ҷорӣ шудаанд

Мақомоти Русия қаблан эълон карда буданд, ки кишварашон аз лиҳози шумораи таҳримҳо дар ҷаҳон дар мақоми аввал қарор дорад. Ба гуфтаи онҳо, то кунун тақрибан 30 ҳазор таҳрим алайҳи Маскав ҷорӣ шудааст.

Қисми зиёди ин таҳримҳо пас аз оғози амалиёти низомии Русия дар Украина қабул шудаанд.

Ҳоло натиҷаи баррасии шикояти ширкати “VK” дар Додгоҳи умумии Иттиҳоди Аврупо маълум нест.

Dialog.tj