Вакилони дифои Силия Флорес, ҳамсари президенти пешини Венесуэла Николас Мадуро, аз вазъи саломатии ӯ дар зиндони Амрико изҳори нигаронӣ кардаанд. Ба гуфтаи онҳо, Флорес метавонад ба ҷарроҳии қалб ниёз дошта бошад ва бояд ба ҳабси хонагӣ интиқол дода шавад.

Ба гузориши расонаҳо, вакилони Флорес қарор аст рӯзи панҷшанбе дар додгоҳе дар Ню-Йорк дархости озод кардани ӯ аз зиндон ва интиқолаш ба ҳабси хонагиро матраҳ кунанд.

Флореси 69-сола ҳамроҳи шавҳараш аз аввали моҳи январ дар боздоштгоҳи Метрополитен дар Бруклини Ню-Йорк нигаҳдорӣ мешавад. Онҳо дар ҷараёни амалиёти шабонаи неруҳои Амрико дар Каракас, пойтахти Венесуэла, боздошт ва ба Иёлоти Муттаҳида интиқол дода шуданд.

Вазъи саломатӣ нигаронкунанда аст

Вакилони Флорес мегӯянд, ки ӯ бо мушкилоти ҷиддии саломатӣ рӯ ба рӯст ва шароити зиндон барои табобати муассири ӯ муносиб нест.

Ба гуфтаи онҳо, ба Флорес иттилоъ додаанд, ки мумкин аст ба ҷарроҳии қалб ниёз дошта бошад. Ӯ ҳамчунин, аз сарчархӣ ва тангии нафас ранҷ мебарад ва эҳтимол дорад моҳи июл ба сактаи сабуки қалб гирифтор шуда бошад.

Вакилонаш гуфтаанд, ки Флорес аз замони интиқол ба боздоштгоҳи Метрополитен тақрибан 11 кило, вазн кам кардааст.

Онҳо ҳамчунин, изҳор доштаанд, ки Флорес ҳангоми амалиёти низомии Амрико осеб дидааст. Ба гуфтаи вакилонаш, ӯро ба девор ё ҷевон задаанд ва дар натиҷа дар баданаш доғҳои доимӣ боқӣ мондаанд.

Вакилони дифоъ пешниҳод кардаанд, ки Флорес ба ҷойи идомаи боздошт дар зиндон, дар як манзил дар Ню-Йорк зиндагӣ кунад ва таҳти назорати шабонарӯзии неруҳои амниятӣ қарор дошта бошад.

Додситонҳо ба озодии ӯ мухолифанд

Бо вуҷуди нигарониҳо аз вазъи ҷисмонии Флорес, додситонҳои Амрико бо дархости озод кардани ӯ мухолифат кардаанд.

Онҳо дар санади додгоҳӣ иддао кардаанд, ки озодии Флорес метавонад хатари ҷиддии фирор ва хатаре барои ҷомеа ба вуҷуд орад. Додситонҳо ҳамчунин, гуфтаанд, ки ҳар бор Флорес ба ёрии тиббӣ ниёз пайдо кардааст, ӯро аз зиндон ба беморхонаи маҳаллӣ интиқол додаанд.

Мадуро ва ҳамсараш иттиҳомҳоро рад мекунанд

Мақомоти Амрико Мадуро ва Флоресро ба иштирок дар тавтиа барои интиқоли кокаин ба Иёлоти Муттаҳида муттаҳам мекунанд. Дар сурати маҳкум шудан, онҳо метавонанд ба ҳабси якумрӣ маҳкум шаванд.

Мадуро ва ҳамсараш иттиҳомҳоро рад карда, худро бегуноҳ эълон кардаанд. Вакилони онҳо ҳамчунин, хостори қатъи парванда шудаанд ва мегӯянд, ки Мадуро ва Флорес ба ҳайси раҳбари як кишвари хориҷӣ ва бонуи аввали он аз масуният бархӯрдор будаанд.

Мадуро боздошти худро “одамрабоӣ” номида, худро “асири ҷангӣ” хондааст.

Вакилони Флорес дар посух ба нигарониҳои додситонҳо гуфтаанд, ки ӯ хатари фирор надорад, зеро мехоҳад аз шавҳараш ҳимоят кунад ва ҳамеша дар канори ӯ бошад.

Dialog.tj